Հանձնաժողովը մերժեց Հայաքվեյի նախագիծը
- 17:10 04.12.2023
ԱԺ պետաիրավական հարցերի մշտական հանձնաժողովն այսօրվա նիստում բացասական եզրակացություն տվեց «Հայաքվե» նախաձեռնության օրենքի նախագծին։
«Հայաքվեն» Ազգային ժողով էր ներկայացրել Քրեական օրենսգրքում լրացումներ կատարելու նախագիծ, որով սահմանվում էր, որ ՀՀ անունից Արցախը որեւէ այլ պետության կազմում ճանաչելը, Հայոց ցեղասպանության ճանաչումից հրաժարվելը կամ դրա վտանգավորությունը նսեմացնելը պատժվում է ազատազրկմամբ։
Նախագծի հիմնական զեկուցող իրավաբան Արամ Պետրոսյանն առաջարկեց նախագծի քննարկումը հետաձգել՝ հաշվի առնելով այն կարեւոր փաստերը, որոնք ներկայացվեցին այսօրվա քննարկման ժամանակ։ Սակայն հանձնաժողովի նախագահ Վլադիմիր Վարդանյանը հայտարարեց որ հնարավոր չէ նախագծի քննարկումը հետաձգել։
Նախագիծը դրվեց քվեարկության, կողմ քվերակեց 3, դեմ՝ 7 պատգամավոր։ Այսպիսով՝ «Հայաքվեի» նախագծին ԱԺ պետաիրավական հարցերի մշտական հանձնաժողովի կողմից բացասական եզրակացություն տրվեց։