Ալեն Սիմոնյանը պատրաստում է Արցախը հանձնողների «մահապատժի ցուցակներ»
- 11:56 05.12.2023
«Եթե այս նախագիծն ընդունվեր, ՌԴ նախագահին դատելու էի՞նք Արցախն Ադրբեջանի կազմում ճանաչելու համար»: Այս մասին այսօր խորհրդարանում հայտարարեց ԱԺ խոսնակ Ալեն Սիմոնյանը՝ որպես Հայաքվեի նախաձեռնության դեմ փաստարկ։
Հայաստանի Ազգային ժողովը դեկտեմբերի 5-ի նիստում հաջորդ խորհրդարանական քառօրյայի օրակարգում չներառեց «Հայաքվե» հասարակական-քաղաքական նախաձեռնության մշակած օրինագիծը, որը նախատեսում է քրեականացնել Հայաստանի Հանրապետության անունից Լեռնային Ղարաբաղը մեկ այլ պետության մաս ճանաչող և Հայոց ցեղասպանության նշանակությունը նսեմացնող ցանկացած գործողություն։
Նախագիծն Ազգային ժողովի օրակարգ մտցնելուն դեմ են արտահայտվել իշխող «Քաղաքացիական պայմանագիր» կուսակցության պատգամավորները։
Քաղաքացիական պայմանագրի անդամները չգիտեն, թե ինչպես հիմնավորեն Արցախը «Ադրբեջանի կազմում» ճանաչելու իրենց հանձնառությունը։ Երեկ հանձնաժողովի նիստում ՔՊ օդիոզ պատգամավորներից մեկը ցինիկաբար հայտարարեց, որ Արցախը հանձնվել է իր իշխանությունների կողմից՝ այն բանից հետո, երբ Հայաքվեի հեղինակ ուժերը Ստեփանակերտում «իշխանափոխություն» իրականացրին։ Պատգամավորն ակնարկել է, որ մինչ այդ Արցախում կային իշխանություններ, որոնք ՔՊ օգնությամբ չէին հանձնի Արցախը։ Թեև ՔՊ առաջնորդ Փաշինյանն անձամբ է ճանաչել «Արցախը որպես Ադրբեջանի մաս»։
Այժմ Ալեն Սիմոնյանը դրանում մեղադրում է Պուտինին, թեև ընդամենը մի քանի օր առաջ ասել էր, որ պաշտոնական Երևանը «արդեն 8 անգամ» կրկնել է, որ Արցախը ճանաչում է որպես «Ադրբեջանի» մաս։
«Քաղաքացիական պայմանագիրը», փաստորեն, սկսեց Արցախը հանձնողների «մահապատժի» ցուցակ կազմել՝ Փաշինյան, Պուտին, Արցախի իշխանությունները… ՔՊ-ն ու Հայաքվեն կարծում են, որ ալիբի ունեն։
Նաիրա Հայրումյան