Այնքան ազնվություն չունեք, որ խոստովանեք սեփական անկարողությունը ու հեռանաք

«Անտուն մնացած արցախցիներին չեն տրամադրում անհրաժեշտ սոցիալական աջակցությունը։ Ամեն օր ես ստանում եմ բազմաթիվ ահազանգեր, որ կառավարության վատ աշխատանքի պատճառով աջակցություն չեն ստանում մարդիկ, որոնք պետք է ստանան անհրաժեշտ օգնությունը։ Շատերը հայտնվել են անելանելի վիճակում՝ չկարողանալով վճարել բնակարանային վարձավճարները։ Ո՞րն է ձեր նպատակը, որ հայրենիքից, տնից-տեղից կտրված արցախցիները կրկի՞ն բռնեն գաղթի ճանապարհը»,- Ազգային ժողովի նիստում հայտարարեց «Հայաստան» խմբակցության պատգամավոր Գառնիկ Դանիելյանը։

«Ասացիք՝ Արցախը Հայաստան է, եւ վերջ, հետո մեր հայրենիքի մի մասը Ադրբեջան ճանաչեցիք։ Արցախի ռազմաքաղաքական ղեկավարությունը գերեվարված է, իսկ Ադրբեջանի նախագահը խոսում է տարածքային նոր նկտրումների մասին։ Խաղաղություն հաստատում են՝ երկիրը հզորացնելով եւ ոչ թե այն մուրալով։ Դադարեցրեք մանիպուլացնել պատերազմից հոգնած, սպառված հանրությանը, այցելեք դպրոցներ, ստուգեք խողովակներ, կախիչները, բայց հեռու մնացեք երկրի կառավարությունից։ Ձեր ամեն օրը նոր չարիք ու նոր պատերազմներ ու նոր արհավիրքներ է բերում մեր երկրին»,- հավելեց պատգամավորը։

Անդրադառնալով բանակում գրանցվող մահվան դեպքերին՝ Դանիելյանն ասաց․ «Ընդհանրապես, բանակում օրինաչափ են դարձել դժբախտ պատահարները, ինքնասպանությունները, սպանությունները։ Մինչե՞ւ երբ է շարունակվելու այս շղթան, ո՞վ է պատասխան տալու այս իրավիճակի համար։ Շարունակաբար գործուղումների մեկնող, ոչ մի հարսանիք, կնունք, ծնունդ բաց չթողնող նախարարին չի՞ հուզում, թե ինչի է վերածվել բանակն իր օրոք։ Հաղթանակած բանակն այսօր ասոցացվում է շարունակական մահերի, դժբախտ պատահարների հետ։ Չկա այս երկրում մի պաշտոնյա, որն այնքան ազնվություն ու համարձակություն կունենա, որ խոստովանի իր անկարողությունը, հեռանա զբաղեցրած պաշտոնից»։