Գերմանիան դյուրացնում է քաղաքացիություն ստանալու ընթացակարգը
- 19:56 19.01.2024
Հունվարի 19-ին Բունդեսթագում երկրորդ ընթերցմամբ և ամբողջությամբ ընդունվել է Գերմանիայի քաղաքացիություն ստանալը դյուրացնելու մասին օրինագիծը։ Այս մասին հայտնում է «Deutsche Welle»-ն։
Փոփոխությունները պետք է ուժի մեջ մտնեն պաշտոնական հրապարակումից երեք ամիս անց՝ ենթադրաբար ապրիլի 1-ից։
Օրինագծով նախատեսվում է արագացնել օտարերկրացիների հպատակագրումը. դրա համար անհրաժեշտ կլինի ապրել երկրում 5 տարի 8-ի փոխարեն, իսկ գերմաներենի լավ իմացության, կամավորական աշխատանքի փորձի, մասնագիտական որակավորում և ոլորտում հաջողություններ ունենալու դեպքում 3 տարին բավարար կլինի:
Բացի այդ, Գերմանիայի քաղաքացիություն ստացած օտարերկրացիներին կթույլատրվի պահպանել իրենց նախկին անձնագրերը, իսկ Գերմանիայում ծնված օտարերկրացիների երեխաները ավտոմատ կերպով երկրի քաղաքացիություն կստանան։ Ներկայումս դա տեղի է ունենում միայն այն դեպքում, եթե ծնողներից մեկը 8 տարուց ավելի ապրում է Գերմանիայում: