Արցախի մի խումբ բնակիչների կողմից կազմակերպվել է ինքնաբուխ ակցիա ի երախտագիտություն Ֆրանսիայի
- 17:02 30.08.2023
Ֆրանսիայի քաղաքապետների ուղեկցությամբ հումանիտար բեռը նախատեսված Արցախի բնակիչների համար այրդեն Կոռնիձորում է, չնայած, որ բեռների հետագա ընթացքը խոչընդոտվում է Ադրբեջանի կողմից:
Այսօր Արցախի մի խումբ բնակիչների կողմից կազմակերպվել է ինքնաբուխ ակցիա ի երախտագիտություն Ֆրանսիայի, որը այս օրերին այն եզակի պետություններից է, որոնք խոսում են Արցախի շրջափակման և Լաչինի անհապաղ բացման մասին:
Ըստ ակցիայի մասնակցի, նրանց հիմնական նպատակը երախտագիտություն հայտնելն է Ֆրանսիայի ղեկավարությանը և ժողովուրդին այս ծանր օրերին Արցախի կողքին լինելու համար:
Մեր զրուցակցի խոսքով, Ֆրանսիան բավականին ակտիվ է թե այս ճգնաժամի, թե արցախյան հարցի միջազգայնացման հարցում, որը շատ կարևոր է, և մենք պետք է կարողանանք միջազգային հանրության ուշադրությունը պահել մեզ վրա, ինչպես նաև ևս մեկ անգամ պետք է վերահաստատենք, որ Լաչինի (Բերձորի) միջանցքը այլընտրանք չունի։
Այն պետք է անհապաղ բացվի և այնտեղ չպետք է լինի ադրբեջանական անցակետ: Այդ ճանապարհը կոչված է ապահովելու Արցախի կապը Հայաստանի և աշխարհի հետ, որը պետք է գործի ըստ 2020 թ. նոյեմբերի 9-ի հայտարարության: