Սեյրան Օհանյան․ Բանակը կարող է չկատարել Փաշինյանի անօրինական հրամանները

Բանակը կարող է չկատարել Նիկոլ Փաշինյանի անօրինական հրամանները եւ հետ չքաշվել Տավուշի մարզում։ Այս մասին այսօր խորհրդարանական ճեպազրույցների ժամանակ ասաց «Հայաստան» խմբակցության ղեկավար Սեյրան Օհանյանը։

Ըստ Օհանյանի՝ հատվածական սահմանազատումը հատկապես Տավուշի մարզից սկսելը հանգեցնելու է ՀՀ ամենանախապատրաստված առաջնագծի հնարավորությունների նվազեցմանը, եւ այդ հատվածում հավելյալ խնդիրներ են ստեղծվելու սահմանամերձ բնակչությանը համար։ Եվ ռազմավարական նշանակություն ունեցող ճանապարհահատվածի նկատմամբ ադրբեջանական վերահսկողությունը բազմապատկելու է Հայաստանի Հանրապետության անվտանգության սպառնալիքները։

«Սահմանագծման գործընթացի իրականացման համար նախապայմաններ չկան, ու այդ ընթացակարգերը խախտվում են, որովհետեւ Ադրբեջանի հետ որեւիցե համաձայնագիր չկա։ Եթե այդ գործընթացի առաջին կետը սահմանազատումն է, դա նշանակում է աշխատել քարտեզների վրա։ Երեկ նույն Նիկոլ Փաշինյանն ասաց, որ որեւիցե քարտեզ չկա, դա նշանակում է, որ այդ սահմանազատումը չի իրականացվել։ Եվ այս ամենը չիրականացրած այցելում է ՀՀ Տավուշի մարզ, ժողովրդի մոտ մտահոգություն ստեղծում եւ ասում, ու սահմանագծում ենք անելու։ Իսկ սահմանագծում նշանակում է տեղում արդեն իրականացնել գործընթաց՝ զորքերին կամ բնակչությանը հետ քաշել ու կահավորել այդ սահմանը։

Այս ընթացակարգի խախտումը նաեւ սահմանադրական նորմի խախտում է, հանցագործություն է, դավաճանական պահվածք սեփական ժողովրդի նկատմամբ։ Եվ գտնում եմ, որ այս գործընթացի մեջ ներառված մարդիկ պետք է պատասխանատվություն կրեն։

Երկրորդ, կարծում եմ, որ եւ սահմանամերձ բնակավայրերում, եւ նույն բանակում կան խելացի մարդիկ, որոնք այս անօրինական գործընթացից կարող են հրաժարվել։ Սահմանազատման ու սահմանագծման աշխատանքները հատվածական իրականացնելը նշանակում է, որ այդ հատվածի վրա պարտադրանք գոյություն ունի, նշանակում է, որ այդ գործընթացից հետո մենք չենք կարող վստահ լինել, որ ադրբեջանական ստորաբաժանումներն այլ հատվածներից հետ են քաշվելու»,- հայտարարեց Օհանյանը։

Լրագրողները հետաքրքրվեցին՝ այսինքն՝ բանակը կարող է անօրինական հրամանները չկատարե՞լ։ Ի պատասխան Սեյրան Օհանյանն ասաց, որ «Յուրաքանչյուր ոք՝ թե՛ զինվորական, թե՛ քաղաքացիական, հասկանում են, որ այս գործընթացն անօրինական է, ընթացակարգերի խախտումը հանցագործություն է։ Եվ այդ հանցավոր գործընթացից հրաժարվելը յուրաքանչյուր մարդու իրավունքների մեջ է մնում, սրա մեջ կարող են լինել նաեւ զինծառայողներ։ Թեեւ բանակը կարգապահ կառույց է եւ իրականացնում է մեր երկրի անվտանգությունը, բայց ես ասում եմ՝ ոչ թե պաշտպանությունից հրաժարվել, այլ անօրինական տրվող հրամաններից հետ կանգնել»։