ՏՏ ոլորտում ուսանելու լավ հնարավորություն՝ 44-օրյա պատերազմում վիրավորված, Արցախից տեղահանվածների համար
- 16:52 06.06.2024
Բեռլինի «Եվրոպացի և հայ մասնագետների ասոցիացիա» ՀԿ-ն, համագործակցելով Երևանի «ՀԱՅԿՈՆԳ» ՍՊ ընկերության հետ, 2024-ի հունիսի 15-ից մինչև 2025-ի հունիսի 14-ը նախատեսում է կազմակերպել և անցկացնել «Վիրավոր և հաշմանդամ զինվորների, կամավորականների, ինչպես նաև Արցախից բռնի տեղահանվածների համար տեղեկատվական տեխնոլոգիաների ուսուցման դասընթացներ» ծրագիրը։
Այն հովանավորում է Գերմանիայի Արտաքին Գործերի Նախարարության կողմից, աջակցում են ՀՀ Սփյուռքի Գործերի հանձնակատարի գրասենյակը և Հայաստանի Ազգային Ագրարային Համալսարանը։
Ծրագրի նպատակը
Հաշվի առնելով արցախցիների բռնի տեղահանման հետևանքով առաջացած սոցիալական ծանր կացությունը, որն այսօր էլ խնդիրներ է հարուցում կրթական, ընդհանուր զարգացման և պատերազմի հետևանքների վերացման աշխատանքներում՝ ծրագիրը նպատակ ունի բարձրացնել 44-օրյա պատերազմի ժամանակ վիրավորում կամ հաշմանդամություն ստացած զինվորների և Արցախից բռնի տեղահանվածների կրթական մակարդակը և աջակցել նրանց, որպեսզի կարողանան գտնել բարձր վճարվող աշխատանք։
Ծրագրի նկարագրությունը
Վերոնշյալ ծրագրով անցկացվում են՝
– Մաթեմատիկայի,
– Բարձրագույն մաթեմատիկայի,
– Python լեզվով ծրագրավորման հիմունքների,
– Արհեստական բանականության և մեքենայական ուսուցման,
– WEB ծրագրավորման,
– Որակի ապահովման (QA),
– Տեխնիկական անգլերեն լեզվի դասընթացներ։
Նախնական գիտելիքներ ՏՏ բնագավառում ծրագրի դիմորդների համար պարտադիր չեն։ Եռամսյա քննությունների արդյունքների հիման վրա մասնակիցները կընտրեն ՏՏ ոլորտի սեփական ուժերին և գիտելիքներին համապատասխան ավելի մատչելի մասնագիտացում։ Оրինակ՝ առաջին եռամսյա քննություններից հետո ծրագրի մասնակիցները տարանջատվում են երկու խմբերի՝ արհեստական բանականության ուսումնասիրման ուղղորդմամբ Python ծրագիրը ուսումնասիրող և WEB ծրագրավորում սովորող հոսքերի։ Երկրորդ եռամսյակի քննության արդյունքներում ձևավորվում է որակի ապահովման (QA) դասընթացներն ուսումնասիրող մեկ այլ 3-րդ խումբ։ Ծրագիրը 4-րդ եռամսյակի վերջին եզրափակվում է ընթացքում կատարած պրակտիկ նախագծային աշխատանքների ներկայացմամբ։
Վերոնշյալ բոլոր առարկաների դասերն անցկացվում են առկա և առցանց եղանակով, իսկ ծրագիրը հաջողությամբ ավարտած մասնակիցներին տրվում են ՀԵՄԱ հ/կ կողմից որակավորման վկայականներ։
Ծրագրին դիմելու և մասնակցելու պայմաններին առավել մանրամասն կարող եք ծանոթանալ այստեղ։