Բոլորը մեզ ուղիղ ասում են, թե ի՞նչ եք ուզում մեզանից, եթե Հայաստանի իշխանությունների արտաքին քաղաքական օրակարգում այդ հարցերը չկան

«ՀՀ կառավարությունը համար մեկ պատասխանատուն է, որ Արցախի էջը չպետք է փակվի, եւ քանի կա Արցախի ժողովուրդ, կա նաեւ Արցախի ժողովրդի իրավունքների պաշտպանության խնդիր։ Հետեւաբար, Հայաստանի կառավարությունը համար մեկ սուբյեկտն է, որն այս ուղղությամբ շատ լուրջ անելիքներ ունի»,- այսօր ԱԳՆ մոտ բողոքի ակցիայի ժամանակ ասաց Արցախի նախկին պետնախարար Արտակ Բեգլարյանը։

Նա ասաց, որ միաժամանակ պետք է աշխատանք տանել միջազգային հանրության հետ։ «Ես տարբեր երկրների դիվանագետների եմ հանդիպում, բոլորն էլ մեզ ուղիղ ասում են, թե ի՞նչ եք ուզում մեզանից, եթե Հայաստանի իշխանությունների արտաքին քաղաքական օրակարգում այդ հարցերը չկան։ Դրա համար բոլորս պիտի գիտակցենք, որ առաջին հերթին մենք Հայաստանի Հանրապետության իշխանություններից ունենք պահանջներ, որպեսզի Արցախի ժողովրդի իրավունքների պաշտպանության հարցերը լինեն արտաքին քաղաքական օրակարգում»,- հավելեց նա։

Արցախցիների պաշտպանության խորհուրդը բողոքի ակցիա է անում ԱԳՆ մոտ, մասնակիցները պահանջագիր ներկայացրեցին ՀՀ կառավարությանը։ Նրանք ԱԳՆ-ից պահանջում են կոնկրետ քայլեր կատարել արցախցիների հավաքական վերադարձի, հայ գերիների ազատ արձակման, Արցախի մշակութային ժառանգության ու մասնավոր սեփականության պաշտպանության, Միջազգային քրեական դատարան պետական դիմումի ներկայացման, միջազգային դատական գանգատներից չհրաժարման եւ ԵԱՀԿ Մինսկի խմբի չլուծարման ուղղությամբ։

Արցախցիները ի նշան բողոքի ԱԳՆ շենքի մոտ վառեցին ՀՀ կառավարության ծրագիրը։ Նրանք այն ժողովրդին խաբելու ծրագիր որակեցին՝ նշելով, որ կառավարության ծրագրով նախատեսված էր Հադրութի եւ Շուշիի դեօկուպացիա, արցախցիների հավաքական վերադարձի ուղղությամբ աշխատանք։ Սակայն կառավարությունը հրաժարվել է ծրագրի այս դրույթներից եւ հակառակ աշխատանքն է իրականացրել։