Զախարովան հաստատել է. Հայաստանը չպետք է վերահսկի “Զանգեզուրի միջանցքը”

Երևանի արձագանքը «Վեստի նեդելի» ծրագրին տարակուսելի է, ասել է ՌԴ ԱԳՆ պաշտոնական ներկայացուցիչ Մարիա Զախարովան։

Հիշեցնենք, որ «Վեստի Նեդելի» հաղորդավար Դմիտրի Կիսելևը հայտարարել էր, որ Նիկոլ Փաշինյանը «ամբողջովին անտեսել է և՛ եռակողմ համաձայնագրով ստանձնած իր պարտավորությունները, և՛ Զանգեզուրի միջանցքը վերջնականապես բացելու Ալիևի կատեգորիկ պահանջը»։ Փոխարենը Փաշինյանն առաջարկել է իր «Խաղաղության խաչմերուկ» նախագիծը, որը, ըստ Կիսելևի, «անընդունելի է Ադրբեջանի համար՝ դժվար լեռնային տեղանքով և կլիմայական ծանր պայմաններով ճանապարհներ կառուցելու անհրաժեշտության պատճառով»։

Զախարովան հաստատել է, որ Մոսկվան հետևողականորեն խոսել է Հարավային Կովկասում բոլոր տրանսպորտային և տնտեսական կապերի համապարփակ ապաշրջափակման մասին՝ հիմնված ամենաբարձր մակարդակով եռակողմ համաձայնագրերի վրա։

Նա ընդգծել է, որ ըստ այդմ տրանսպորտային հաղորդակցությունների հսկողությունն իրականացնում է ՌԴ ԱԴԾ սահմանային ծառայությունը, և կողմերի համաձայնությամբ կապահովվի Նախիջեւանի Ինքնավար Հանրապետությունը Ադրբեջանի արևմտյան շրջանների հետ կապող նոր տրանսպորտային հաղորդակցությունների կառուցումը։

Միաժամանակ, ՌԴ ԱԳՆ ներկայացուցիչը հիշեցրել է, որ եռակողմ աշխատանքային խումբը երբեք չի քննարկել Հայաստանում արտատարածքային միջանցքների ստեղծման հարցը։ Ընդհակառակը, պայմանավորվածություն է ձեռք բերվել, որ երկրներն կունենան ինքնիշխանություն և իրավասություն իրենց տարածքով անցնող երթուղիների նկատմամբ։

Զախարովան չի ասել, թե ինչպես է ՌԴ ԱԴԾ-ի վերահսկողությունը համապատասխանում «Հայաստանի ինքնիշխանությանը»։