Ալեն Սիմոնյանը “անկլավների” հետ խնդիր չի տեսնում․ մենք էլ Արծվաշեն ունենք

ԱԺ նախագահ Ալեն Սիմոնյանը, անդրադառնալով այսպես կոչված «անկալվները» հանձնելու հարցին, լրագրողներին ասաց․ «Մենք անկլավների հետ կապված ոչ մի խնդիր չենք տեսնում, կա Արծվաշենը, մեր հայկական անկլավը, եւ մենք ոչ մի խնդիր չենք տեսնում որեւցիե փուլում այդ քննարկումը սկսելու։ Չենք կարծում, որ դա օրակարգային մի հարց է, որի շուրջ մենք պետք է ինչ-որ ձեւով անհանգստանանք կամ մտահոգություն ունենանք»։

Լրագրողները հիշեցրին, որ Հայաստանի տարածքները հանձնելու դեպքում ռազմավարական նշանակության ճանապարհների խնդիր կստեղծվի։ Ալեն Սիմոնյանն ի պատասխան ասաց․ «Շատ կարեւոր է, որ իրավական փաստաթղթավորում լինի բոլոր այդ տարածքների հետ կապված։ Կնայենք, եթե այդ տարածքների իրավական փաստաթղթավորում կա, մենք ոչ մի խնդիր չենք տեսնում։ Ինչ վերաբերում է ճանապարհներին, Արծվաշենը նույնպես գտնվում է անկլավային կարգավիճակում եւ Արծվաշենը նույնպես ճանապարհի խնդիր պետք է ունենա»։