2026-2028 թ. նախատեսվում է 150 մլրդ դրամ հատկացնել տեղական ռազմարդյունաբերության ոլորտին
- 12:29 13.01.2026
2018 թվականից հետո Հայաստանի պաշտպանության ծախսերն ավելացել են 1,1 մլրդ դոլարով։ Այս մասին այսօր հրավիրած ասուլիսում ասաց պաշտպանության նախարար Սուրեն Պապիկյանը։
Նա նշեց, որ եթե 2018 թվականին պաշտպանության ծախսերը կազմել են 245 մլրդ դրամ, ապա 2025 թվականին՝ 664 մլրդ դրամ, այն է՝ 1 մլրդ 741 մլն 604 հազար դոլար։
Նա նշեց, որ շատ են քննադատություններն այն մասին, որ պաշտպանության ոլորտին տրամադրվում են քիչ ծախսեր։ Այինինչ, ըստ Պապիկյանի, թվերն այլ են փաստում։
Անդրադառնալով սպառազինության գնմանը՝ նախարարն ասաց․ «Կարեւոր եմ համարում սպառազինության, ռազմական տեխնիկայի ձեռքբերման շուկաների դիվերսիֆիկացիան։ Բայց նաեւ կարեւորում եմ տեղական արտադրության զարգացումը։ 2022 թվականին տեղական ռազմարդյունաբերության հետ պայմանագրերի ծավալը կազմել է 9,5 մլրդ դրամ։ Այսօր գործող պայմանագրերով այն հասել է 170 մլրդ դրամի, որ մեծ մասն արդեն մատակարարված է։ Բայց նաեւ կարեւորում եմ, որ 2026-2028 թվականների եռամյա ծրագրով կառավարությունը նախատեսում է հատկացնել 150 մլրդ դրամ տեղական ռազմարդյունաբերության ոլորտին»։