Հնդկաստանի և Եվրոպայի խոշորագույն առևտրային համաձայնագիրը. Բայրամովը մեկնում է Չինաստան
- 18:13 27.01.2026
Եվրամիությունը և Հնդկաստանը հայտարարել են պատմական առևտրային համաձայնագրի մասին: Բանակցությունները, ընդհատումներով, շարունակվում են գրեթե երկու տասնամյակ տարի: Երկու կողմերն էլ ձգտում են խորացնել կապերը՝ Միացյալ Նահանգների հետ լարվածության ֆոնին։
«Մենք կնքել ենք համաձայնագիր, որը կարելի է անվանել «բոլոր գործարքների մայրը», – գրել է Եվրահանձնաժողովի նախագահ Ուրսուլա ֆոն դեր Լեյենը Նյու Դելիում Հնդկաստանի վարչապետ Նարենդրա Մոդիի հետ հանդիպումից հետո արված հայտարարության մեջ: Նա համաձայնագիրը անվանել է պատմական։
Համաձայնագիրը թույլ կտա ապրանքների ազատ առևտուր իրականացնել ԵՄ 27 անդամ երկրների և աշխարհի ամենախիտ բնակեցված երկրի միջև: Միասին նրանք ներկայացնում են համաշխարհային համախառն ներքին արդյունքի գրեթե 25%-ը և երկու միլիարդ բնակչություն ունեցող շուկան։
Կանխատեսվում է, որ համաձայնագիրը զգալիորեն կնվազեցնի սակագները և կընդլայնի մուտքը շուկա երկու կողմերի համար։
Հիշեցնենք, որ Հայաստանը ակտիվորեն համագործակցում է Հնդկաստանի հետ, իսկ Հնդկաստանի անկախության օրվա կապակցությամբ ՀՀ արտաքին գործերի նախարար Արարատ Միրզոյանը հայտարարել է, որ Հայաստանը պատրաստ է Հնդկաստանի հետ ամենահամարձակ համագործակցության։
Միևնույն ժամանակ, Ադրբեջանի արտաքին գործերի նախարար Ջեյհուն Բայրամովը պաշտոնական այցով մեկնել է Չինաստան, որտեղ հունվարի 28-ին կհանդիպի Չինաստանի արտաքին գործերի նախարար Վան Իի հետ: Բայրամովը Պեկին է ժամանել չինացի գործընկերոջ հրավերով: