Նժդեհ Իսկանդարյանը՝ արցախցիներին չվճարված գումարների մասին

«Գումարը տրամադրվել է 50 ընտանիքի, որոնց մեջ կան զոհվածների ընտանիքներ, հաշմանդամություն ունեցող անձինք, ինչպես նաև օնկոլոգիական հիվանդությամբ բուժվող որոշ մարդկանց»,- ասել է նա։

Արցախի պետնախարարը պատմեց, որ վերջապես կապ է հաստատվել «Արցախբանկ»-ի ներկայացուցիչների հետ։

«Նրանց կողմից կար հանդիպելու և բոլոր առկա խնդիրները քննարկելու պատրաստակամություն։ Հանդիպել ենք և եկել այն մտքին, որ ստեղծվի հանձնախումբ, քննարկվի բոլոր խնդիրները և փորձենք լուծումներ գտնել։ Իրենց կողմից հանձնախումբը պիտի գլխավորեր Արտակ Բալայանը, մեր կողմից՝ ես։

Հանդիպումը տեղի է ունեցել։ Օրակարգում հիմնական հարցը եղել է Արցախի ներդրումային հիմնադրամի հետ կապված, ինչը ՀՀ կառավարության կողմից թույլ չի տրվել գրանցել։

Նաև քննարկել ենք այն ավանդները, որ դրված են «Արցախբանկ»-ում։ Խոսքը 18 տարեկանը չլրացած երեխաների ավանդների մասին է։ Արցախի կառավարության որոշմամբ գումարները պետք է փոխանցվեր այդ ընտանիքներին, քանի որ հայտնվել ենք այսպիսի ֆորսմաժորային իրավիճակում։ Ասեմ, որ մինչ օրս «Արցախբանկ»-ն այդ գումարները չի փոխանցել»,- ասաց Ն. Իսկանդարյանը։

Հանդիպմանը քննարկվել է նաև արցախցիների բնակապահովման հարցը։

«Խոսք է գնացել, թե ինչո՞ւ «Արցախբանկ»-ը չի միացել այդ ծրագրին։ Շատ ուղիղ իրենց ասել եմ, քանի որ գիտեի, որ մեր հայրենակիցները փորձելու են բնակապահովման ծրագրով բնակարաններ ձեռք բերել՝ առաջնային դիմելով «Արցախբանկ»-ին, ապա նրանք «չկա մարդ, չկա խնդիր» կարգախոսով են առաջնորդվել։ Դա եղել է պատճառը, որ նրանք չեն միացել։ Կարող եմ նաև փաստեր հրապարակել։ Խոսել եմ սոցապ նախարարության հետ, Կենտրոնական բանկից որևէ նախապայման չի եղել։ Այսինքն՝ հեշտ ու հանգիստ «Արցախբանկ»-ը կարող էր միանալ այս ծրագրին, ինչը կարող էր որոշակի թեթևացնել մեր հայրենակիցների բնակապահովման խնդիրը»,- ասաց պետնախարարը։

Ն. Իսկանդարյանը պատմեց, որ հանդիպումների ժամանակ անդրադարձ է կատարվել Շուշիի տեխնոլոգիական քոլեջի 16 ուսանողների ուսման վարձի հարցին։

«Նրանցից 11-ը զոհվածների երեխաներ են։ Պատասխանը եղել է այն, որ այս փուլում չեն կարող փոխանցել։ Պետք է սպասենք՝ հունիսի 7-ից հետո։ Բայց խնդիրն այն է, որ մինչև մայիսի 10-ն այդ գումարները պետք է վճարվեն»,- ասաց նա։