Շոյգուն չի հիշատակել Ղարաբաղում Թուրքիայի հետ համատեղ գործողությունը
- 19:25 17.06.2026
Ռուսաստանի Անվտանգության խորհրդի քարտուղար Սերգեյ Շոյգուն, ըստ ՏԱՍՍ-ի, ասել է, որ Ռուսաստանը և Թուրքիան միշտ գտել են փոխադարձաբար ընդունելի լուծումներ լայն շրջանակի խնդիրների համար։
Թուրքիայի արտաքին գործերի նախարար Հաքան Ֆիդանի հետ հանդիպման ժամանակ նա հիշել է վերջին տարիներին իրենց ակտիվ համատեղ աշխատանքը։
Որպես օրինակ՝ Շոյգուն նշել է «Սիրիայում միջազգային ահաբեկչության դեմ պայքարի համատեղ ջանքերը»։ «Ես չեմ հիշում մի ժամանակ, երբ մենք չավարտեինք մեր աշխատանքը՝ լինի դա Սիրիայում լարվածության թուլացման գոտի ստեղծելը, թե միջազգային ահաբեկիչների դեմ պայքարը», – ընդգծել է Ռուսաստանի Անվտանգության խորհրդի քարտուղարը։ Նա նաև ուշադրություն է հրավիրել «Ուկրաինայի հարցում» համատեղ ջանքերի վրա։
Թուրքիայի արտաքին գործերի նախարարի խոսքով՝ «Ռուսաստանի հետ համատեղ ջանքերը մեծ նշանակություն ունեն Կովկասում և Կենտրոնական Ասիայում կայունության համար», և «լոգիստիկան և առևտրային հարաբերությունները շատ կարևոր են երկկողմ հարաբերություններում»։
2020 թվականին Արցախում տեղի ունեցած պատերազմից հետո Շոյգուն ասել է, որ Ռուսաստանը և Թուրքիան համատեղ աշխատել են Ղարաբաղում բարդ խնդիրները լուծելու համար։ Ակնայում բացված ռուս-թուրքական համատեղ կենտրոնը գործել է 2020-ից մինչև 2024 թվականը և փակվել է միայն Արցախից ամբողջ հայ բնակչության բռնի տեղահանումից հետո։ Այդ ժամանակ Ակնայում գտնվող ռուս գեներալը թուրք գեներալին զեկուցեց, որ «վերջապես խաղաղություն է եկել Ղարաբաղ»: