Սուննիական դաշինքը՝ ՆԱՏՕ-ն, Մեքքան, նավթը և միջուկային զենքը

Թուրքիայի արտաքին գործերի նախարար Հաքան Ֆիդանը «Անադոլու» գործակալությանը տված հարցազրույցում հայտարարել է, որ Մեքքայում Թուրքիայի, Պակիստանի և Սաուդյան Արաբիայի միջև ստորագրված պաշտպանական համաձայնագիրը նախատեսում է ՆԱՏՕ-ի 5-րդ հոդվածին նման փոխադարձ պաշտպանության մեխանիզմ։

Նախարարի խոսքով՝ Եգիպտոսը կարող է նույնպես միանալ համաձայնագրին։

«Ոչ մի երկիր, որը չի հարձակվել մեզ վրա, մեզ համար թիրախ չէ», – նշել է Ֆիդանը, հավելելով, որ համաձայնագիրը ուղղված չէ մասնավորապես Իրանի դեմ։

Թուրքիան, Սաուդյան Արաբիան և Պակիստանը ամենամեծ սուննիական երկրներից են, և Իրանի շիական թևի հետ համեմատությունը պատահական չէ։

Թեհրանը բավականին զուսպ է արձագանքել սուննիական ՆԱՏՕ-ի ստեղծմանը։ Իրանի նախագահ Մասուդ Պեզեշկիանը հայտարարել է, որ 40-օրյա պատերազմի ընթացքում փորձեր են արվել հարձակվել իրանական սահմանային կետերի վրա հյուսիս-արևմուտքում և հարավ-արևելքում և զորքեր մտցնել երկիր, բայց «և՛ Աֆղանստանը, և՛ Պակիստանը խմբեր են ուղարկել իրավիճակը վերահսկելու համար և հստակեցրել են, որ ոչ մեկին թույլ չի տրվի ներթափանցել Իրան իրենց տարածքից և անկարգություններ առաջացնել երկրի ներսում»։

Նա նաև հայտարարել է, որ Իրանը միայն արձագանքում է հարևան երկրներում գտնվող ամերիկյան բազաներից իրականացվող հարձակումներին և չունի այդ երկրների վրա հարձակվելու մտադրություն։

Արևմտյան լրատվամիջոցները գրում են Թուրքիայի, Սաուդյան Արաբիայի և Պակիստանի միջև դաշինքի ավելի լայն ենթատեքստի մասին: «Թուրքիան ՆԱՏՕ-ում ունի երկրորդ ամենամեծ բանակը՝ Միացյալ Նահանգներից հետո: Սաուդյան Արաբիան Պարսից ծոցի ամենամեծ տերությունն է, իսլամի երկու ամենասուրբ սրբավայրերի պահապանը և աշխարհի առաջատար նավթ արտահանողներից մեկը: Պակիստանը մնում է միակ մուսուլմանական երկիրը, որն ունի միջուկային զենք», – գրում է BBC-ն։

Այս «կոնգլոմերատը» ենթադրում է ՆԱՏՕ-ի ներկայությունը, ինչպես նաև հնարավորություն, որ Պակիստանի միջուկային զենքը «կիսվի» Թուրքիայի և Սաուդյան Արաբիայի հետ։

Թուրքիայի արտաքին գործերի նախարար Հաքան Ֆիդանը, մեկնաբանելով ռուս-ուկրաինական պատերազմը, ակնարկել է, որ Ռուսաստանը կարող է միջուկային զենք օգտագործել ռազմաճակատում և թիկունքում կրիտիկական հյուծման դեպքում, հաղորդում է Anadolu-ն։

«Ռուսաստան կատարած իմ այցի ժամանակ թվում էր, թե այս հարցը կարող է բարձրացվել, քանի որ ասվում էր, որ հանրությունը նմանատիպ բան է պահանջում։ Մենք այս մասին խոսել ենք մեր արևմտյան գործընկերների հետ, և նրանք նույնպես գիտեն դա։ Սա վտանգավոր իրավիճակ է։ Այն ամենը, ինչ այդ մարդիկ ասում են, ի վերջո տեղի է ունենում», – հայտարարել է Թուրքիայի արտգործնախարարը։

Այսպիսով, Թուրքիան փորձում է միջուկային զենք ձեռք բերել Պակիստանի միջոցով՝ իբր թե Ռուսաստանի կամ որևէ այլ կողմից հնարավոր հարձակումներից պաշտպանվելու համար։