Ամերիկացիները Բաքվում քննարկեցին TRIPP-ը։ Ադրբեջանի նոր դերը

Ադրբեջանի փոխարտգործնախարար Էլնուր Մամեդովն ընդունել է Բաքու այցելած Հայաստանում ԱՄՆ գործերի ժամանակավոր հավատարմատար Դեյվիդ Ալենին։ Հանդիպմանը մասնակցել է նաև Ադրբեջանում ԱՄՆ գործերի ժամանակավոր հավատարմատար Էմի Քարլոնը։

Կողմերը քննարկել են ադրբեջանա-հայական հարաբերությունների կարգավորմանը, խաղաղության գործընթացի առաջխաղացմանը, երկարաժամկետ և կայուն խաղաղության ապահովմանը, ինչպես նաև տարածաշրջանում կայունության և անվտանգության ամրապնդմանը վերաբերող հարցեր։

Նրանք նաև քննարկել են Էլնուր Մամեդովի Վաշինգտոնի խաղաղության գագաթնաժողովի և ստորագրված եռակողմ հռչակագրի տարեդարձի կապակցությամբ ԱՄՆ կատարած այցի արդյունքները։ Նրանք մտքեր են փոխանակել «Թրամփի ճանապարհ միջազգային խաղաղության և բարգավաճման համար» (TRIPP) ծրագրի իրականացման, ինչպես նաև երթուղու երկայնքով ենթակառուցվածքների կառուցմանը վերահսկող կառավարչական ընկերության ստեղծման վերաբերյալ։

Ավելին, կողմերը քննարկել են Ադրբեջանի և ԱՄՆ-ի երկկողմ օրակարգի շուրջ համագործակցության հեռանկարները և ռազմավարական գործընկերության խարտիայում արտացոլված ոլորտները։

Մեկուկես տարի է, ինչ Ադրբեջանում ԱՄՆ դեսպան չկա, իսկ Հայաստանում՝ ութ ամիս։ ԱՄՆ վարչակազմը դեսպաններ նշանակելու ծրագրեր չունի, չնայած այն հանգամանքին, որ ԱՄՆ-ն մեկ տարի առաջ Ադրբեջանի և Հայաստանի հետ ստորագրել է խաղաղության և TRIPP-ի համաձայնագրեր։

Ինչո՞ւ էր Հայաստանում ԱՄՆ գործերի ժամանակավոր հավատարմատարը Բաքվում քննարկում TRIPP-ը, եթե TRIPP համաձայնագիրը ստորագրվել էր Հայաստանի և ԱՄՆ-ի միջև։ Կա՞ արդյոք որևէ մտադրություն TRIPP-ի շինարարության որոշ պարտականություններ փոխանցել Ադրբեջանին։