Ընտանիքը միավորվել է տարհանումից հետո՝ Արցախից դուրս
- 20:40 05.10.2023
Նունե Գրիգորյանը Արցախի այն կանանցից է, որոնք տղամարդկանց հետ միասին ծառայում էին հայրենիքի պաշտպանությանը: Պատմում է, որ սեպտեմբերի 19-ին դիրքերում էր, երբ վերադարձավ Ստեփանակերտ, կապը շրջանների հետ արդեն կորցված էր, իսկ նրա բոլոր հարազատները, որոնց մեջ էին նաև երկու անչափահաս երեխաները, մնացել էին գյուղում:
Երկար էր փնտրում ընտանիքին, ոմանք ասում էին, որ բնակչությունը մնացել է գյուղում, ոմանք պնդում էին, որ գյուղից մարդիկ տեղափոխվել են ավելի ապահով գյուղ:
Նույնիսկ դիմել էր ռուս խաղաղապահներին, որպեսզի գոնե մեքենա կամ վառելիք տրամադրեն գյուղ հասնելու համար, սակայն պատասխանը բացասական էր՝ չեն կարող:
Տարհանման արդյունքում ընտանիքը միավորվեց արդեն Արցախից դուրս:
Խոսելով կորցրածի մասին Նունեն ասում է, որ ամեն ինչ թողել են Արցախում, նույնիսկ ոսկեղենն է թողել տանը:
Ընտանիքի գլխավոր խնդիրը այժմ բնակարանն է, որը չեն կարողանում գտնել․ մի կողմից չկա, մյուս կողմից եղածի վարձը շատ բարձր է:
Քրիստինա Ալավերդյան
