Արցախի Սահմանադրական բոլոր մարմինները իրենց ղեկավարներով շարունակում են զբաղեցնել այդ պաշտոնները. պետնախարար

Սահմանադրական բոլոր մարմինները իրենց ղեկավարներով շարունակում են զբաղեցնել հասարակական հիմունքներով այդ պաշտոնները: Այս մասին Արցախի Հանրային հեռուստաընկերության  հետ զրույցում ասել է Արցախի պետնախարար Արթուր Հարությունյանը:

«Սահմանադրական բոլոր մարմինները իրենց ղեկավարներով շարունակում են զբաղեցնել հասարակական հիմունքներով այդ պաշտոնները եւ բոլոր մեր սահմանադրական մարմինները հենց այդ հրամանագրով պահպանելու եւ հետագայում նաեւ որոշակի աշխատանք կատարելու ցանկության դեպքում նաեւ այդ աշխատանքները իրականացվելու են: Այս պահի դրությամբ Արցախի Հանրապետության կառավարությունը որեւէ ծրագիր չի կարող իրականացնել, քանի որ ֆինանսական ռեսուրսների բացակայության պայմաններում չենք կարող իրականացնել: Մեր հայրենակիցների կրթական, սոցիալական եւ այլ հարցերի վերաբերյալ կարգավորումները տրվում են ՀՀ կառավարության կողմից, ողջ պարտավորությունը ստանձնել է ՀՀ կառավարությունը: Մենք ունենք տարբեր ձեւաչափերով համագործակցության, հանդիպումների եւ  քննարկումների օրակարգ եւ կարողանում ենք ապահովել մեր ժողովրդի խնդիրները, բնակիչների խնդիրները, ներկայացնել առաջարկների տեսքով ՀՀ կառավարությանը, որպեսզի կարողնանք այդ  հոգսերը թեթեւացնել, կամ ծրագրերը ավելի արդյունավետ դարձնել»,-ասաց նա:

Անդրադառնալով Արցախի պետական մարմինների աշխատակիցների աշխատավարձերի վերջնահաշվարկի հետ կապված խնդիրներին, Հարությունյանը ասաց, որ օրենքով նախատեսված է և՜ վերջնահաշվարկ և՜ արձակման նպաստ, բայց քանի որ  կառավարությունը որեւէ ֆինանսական  ռեսուրս չունի, այս պահին հաշվառված է այն որպես Արցախի Հնարապետության  կառավարության պարտավորություն:

«Ինչ վերաբերում է աշխպատանքային գրքույկների տրամադրմանը եւ մնացած բոլոր հարցերին, իհարկե, մեր տարբեր գերատեսչություններ, քանի որ աշխատակիցներից ոչ բոլորն են գտնվում Երեւանում, գերատեսչությունները ըստ պայմանավորվածութունների են տրամադրում աշխատանքայյին գրքույկները»,-ասաց նա:

Հարցին, թե ինչու սեպտեմբերի համար աշխատավարձերը 100 տոկոսով չվճարվեցին, Արցախի պետնախարարը պատասխանեց, որ տեղահանվելու պահին գանձապետական հաշվում եղած ֆինանսական միջոցները կազմել են աշխատավարձային ֆոնդի 85 տոկոսը։ Աշխատավարձերն այդ պատճառով վճարվել են եղած միջոցների համամասնությամբ։

Այդուհանդերձ, պետնախարարը նշեց, որ սեպտեմբերի աշխատավարձերի 15 տոկոսը, ինչպես և վերջնահաշվարկները համարվում են Արցախի Հանրապետության կառավարության պարտավորությունը։