Երեսուն տարի արցախցիներին, որ պաշտպանել են մեր երկրի անվտանգությունը, չեն ասել՝ «դու ճամփորդական անձնագիր ես ունեցել»:
- 11:55 14.11.2023
Ազգային ժողովի այսօրվա նիստում «Հայաստան» խմբակցության պատգամավոր Գեղամ Մանուկյանն ասաց, որ Միգրացիայի եւ քաղաքացիության ծառայության պետ Արմեն Ղազարյանն առավոտից գիշեր հեռուստաեթերներից չի իջնում եւ փորձում է Հայաստանի հանրությանը համոզել, որ Արցախի Հանրապետության քաղաքացիներին տրված այդ կապույտ անձնագիրը լոկ ճամփորդական անձնագիր է, եւ դրանով չեն կարող Արցախի Հանրապետության քաղաքացիները տարբեր պաշտոնների նշանակվել:
«Բայց, օրինակ, Անվտանգության խորհրդի քարտուղարը, որը ծնունդով Արցախի Հանրապետության Մարտունիից է, վստահաբար այդպիսի անձնագիր է ունեցել»,- ասաց պատգամավորը։ Գեղամ Մանուկյանը հավելեց․ «Գլխավոր շտաբի պետ Էդվարդ Ասրյանը, որը ծնունդով Հադրութի Ազոխ գյուղից է, վստահ այդպիսի անձնագիր է ունեցել: Երեսուն տարի տարի շարունակ Արցախի առաջնագծում արցախցիները, որ պաշտպանել են մեր երկրի անվտանգությունը, Ջերմուկի ու Վարդենիսի անվտանգությունը, նրանց չեն ասել՝ «դու ճամփորդական անձնագիր ես ունեցել»: Պարտադիր կուտակային համակարգում վճարում կատարած արցախցուն չեն ասել, որ դու ՀՀ անձնագիր չես ունեցել, քաղաքացի չես ու վաղն էլ կենսաթոշակ չես ստանալու: Նույն 1000 դրամների հիմնադրամ վճարումներ կատարող արցախցուն չեն ասել՝ «դու միայն ճամփորդական անձնագիր ունես ու ՀՀ քաղաքացի չես»: