Շուրջ 300 արցախցի ՏՏ ոլորտում սովորելու հնարավորություն կունենա

Տեղեկատվական տեխնոլոգիաների ոլորտում աշխատող հայաստանյան կազմակերպությունները տեխնոլոգիական կրթության տրամադրող Armenian Code Academy (ACA) կենտրոնի նախաձեռնությամբ «Tech for Artsakh» նախաձեռնության շրջանակում մեկնարկում են դասընթացներ ԼՂ-ից  բռնի տեղահանված մի խումբ երիտասարդների համար:

«Արմենպրես»-ի հաղորդմամբ՝ դասընթացները տևելու են 3-4 ամիս, յուրաքանչյուրի համար անհատական կրթաթոշակ է սահմանվելու: Ծրագիրը մեկնարկելուն պես շուրջ 300 արցախցի երիտասարդներ հնարավորություն կունենան սկսել իրենց կրթական ուղին տեխնոլոգիական ոլորտում:

Armenian Code Academy ընկերության մարզային զարգացման գծով տնօրեն Լևոն Թադևոսյան նշեց, որ մտահղացումը եղել է դեռ հոկտեմբերի սկզբին և այդ ժամանակ նախատեսվել էր 50 կրթաթոշակ տրամադրել: Սակայն միայն 3 օրում ավելի քան 150 դիմում-հայտ են ստացել և որոշել դիմել գործընկերների օգնությանը:

«ACA-ն դեռևս հոկտեմբերի սկզբին, կարևորելով բռնի տեղահանված մեր հայրենակիցների կրթությունը, տրամադրել էր 50 կրթաթոշակ՝ անվճար սովորելու տեխնոլոգիական ոլորտի ամենապահանջված մասնագիտությունները, դրանով իսկ կոչ անելով տեխնոլոգիական ոլորտի կազմակերպություններին միանալու շարժմանը և համալրել կրթաթոշակային ֆոնդը։  Բոլոր ընկերությունները, որոնք միացել են մեզ, առաջարկում են մի շարք մասնագիտություններ, ինչպիսիք են՝ ծրագրավորման լեզուներ, դիզայն և այլն»,- նշեց Թադևոսյանը:

Նախաձեռնությանը միացել է ավելի քան 10 ընկերություն, սակայն մի քանիսի հետ էլ դեռ քննարկումներ են ընթանում: Դասընթացներին մասնակցելու համար դիմողները պետք է թեստ լրացնեն, ինչից հետո էլ ավելի պարզ կդառնա՝ որ մասնագիտությունն ավելի հարմար կլինի: Թադևոսյանը պատմեց՝ նման նախաձեռնությունը առաջին անգամը չէ՝ մարզերի երիտասարդների համար դեռևս 2022 թվականից դասընթացներ են կազմակերպել՝ տրամադրելով 150 կրթաթոշակ:

«Երբ հումանիտար որևէ ճգնաժամ է լինում, պետությունն ունի իր գործառույթները, իսկ անհատ ձեռնարկությունները պետք է աջակից լինեն իրենց ոլորտներում, լրացնեն բացերը: Քանի որ մենք տեխնոլոգիական կրթություն տրամադրող լավագույն ընկերություններից մեկն ենք, որոշեցինք մեր ուժերի չափով աջակից լինել ստեղծված իրավիճակը կայունացնելու գործում: Պետք է օգնենք, որ մեր հայրենակիցներն այստեղ մնան, զարգանան, աշխատեն: Մենք նպատակ ունենք տեխնոլոգիական կրթությունը հասանելի դարձնել բռնի տեղահանված մեր հայրենակիցներին»,- եզրափակեց նա:

Armenian Code Academy-ի հիմնադիր Նարեկ Ասլիկյանը վստահեցրեց՝ դասընթացից հետո կազմակերպությունները փորձելու են ամեն կերպ աջակցել մասնակիցներին, որպեսզի վերջիններս հնարավորինս հեշտ կարողանան աշխատանք գտնել:

Armenian Code Academy (ACA)-ն տեխնոլոգիական կրթության կենտրոն է, որի նպատակն է ՏՏ ոլորտում ամենապահանջված մասնագիտություններով կրթել և վերապատրաստել ապագա և ներկայիս տեխնոլոգիական ոլորտի մասնագետների՝ լրացնելով աշխատաշուկայում առկա բացը:

Ունենալով շուրջ 10,000 շրջանավարտներ Երևանից և մարզերից, ACA-ը Հայաստանի ՏՏ ոլորտի զարգացման ակտիվ և նվիրված ջատագովներից է: