Արծվիկ Մինասյան. իրականում Արցախի Հանրապետությունից բռնի տեղահանվել է 150 հազար եւ ավելի մարդ
- 12:05 21.11.2023
Ազգային ժողովն արտահերթ նիստ է գումարել՝ քննարկելու Արցախի Հանրապետությունից բռնի տեղահանված անձանց սոցիալական աջակցության ծրագրերին գումար հատկացնելու հարցը։ Ֆինանսների փոխնախարար Վահան Սիրունյանն իր խոսքում հայտարարեց, որ Լեռնային Ղարաբաղից բռնի տեղահանվել է 100 հազար եւ ավելի մարդ։
«Հայաստան» խմբակցության պատգամավոր Արծվիկ Մինասյանը հայտարարեց, որ իրականում Արցախի Հանրապետությունից բռնի տեղահանվել է 150 հազար եւ ավելի մարդ։ Նա կառավարությանը կոչ արեց թվերը ճիշտ ներկայացնել։ «Եկեք դադարենք օգտագործել 100 հազար եւ ավելի թիվը, օգտագործենք 150 հազար եւ ավելի թիվը, որովհետեւ Արցախի բնակչությունն այդքան է եղել մինչեւ ադրբեջանական պատերազմներն ու մյուս գործողությունները։ Այսինքն՝ փաստացի Արցախի Հանրապետության 150 հազար եւ ավելի քաղաքացիներ այսօր բռնի տեղահանված են, ցեղասպանության են ենթարկվել եւ չեն կարողանում իրենց հայրենի բնակավայրերը վերադառնալ։ Սա կարեւոր է, որ ֆիքսենք՝ խոսքը 150 հազար եւ ավելի արցախցիների մասին է»,- հայտարարեց Արծվիկ Մինասյանը։