Բաքուն արգելափակում է ՅՈՒՆԵՍԿՕ-ի առաքելություն ԼՂ ուղարկելու նախաձեռնությունը. ՀՀ ԱԳՆ
- 10:30 29.11.2023
Ադրբեջանը շարունակում է արգելափակել ՅՈՒՆԵՍԿՕ-ի առաքելություն Լեռնային Ղարաբաղ ուղարկելու ՀՀ նախաձեռնությունը։ Այդ մասին ի պատասխան Sputnik Армения -ի հարցմանն ասել են ՀՀ ԱԳՆ-ում։
Նոյեմբերի կեսերին սոցցանցերում հայտնվեցին կադրեր, որոնք վկայում էին այն մասին, որ Ադրբեջանը խաչեր է հանել Ստեփանակերտի Սուրբ Աստվածածին տաճարի գմբեթներից։
Բացի այդ, Կովկասյան ժառանգության պաշտպանության միջազգային կազմակերպությունը՝ Caucasus Heritage Watch-ը հայտնել է Շուշիի երկու հայկական գերեզմանոցների ոչնչացման մասին։
Հայաստանի ԱԳՆ-ն նշել է, որ 2020 թվականին Լեռնային Ղարաբաղի վրա Ադրբեջանի լայնածավալ հարձակումից հետո Երևանը մշտապես բարձրացնում է ԼՂ-ում հայկական մշակութային և կրոնական ժառանգության ոչնչացման խնդիրը մասնագիտացված միջազգային կազմակերպություններում, այդ թվում՝ ՅՈՒՆԵՍԿՕ-ում։
Դեռևս 2020 թվականի նոյեմբերին Հայաստանը սատարել է ՅՈՒՆԵՍԿՕ-ի գլխավոր տնօրենի նախաձեռնությունը՝ փորձագիտական խումբ ուղարկելու Լեռնային Ղարաբաղ և ներգրավվել առաքելության հնարավորինս արագ կազմակերպման գործընթացում։
«Սակայն Ադրբեջանը մշտապես արգելափակում է առաքելություն ուղարկելու նախաձեռնությունը», – նշել են նախարարությունից։
Սեպտեմբերի 19-ին Ադրբեջանի կողմից Լեռնային Ղարաբաղի վրա հարձակումից և դրան հաջորդած էթնիկ զտումներից հետո հայկական մշակութային ժառանգության պահպանման խնդիրն էլ ավելի հրատապ է դարձել։
2023 թվականի նոյեմբերի 9-ին Հայաստանի արտգործնախարար Արարատ Միրզոյանը և ՅՈՒՆԵՍԿՕ-ի գլխավոր տնօրեն Օդրի Ազուլեյը հանդիպման ժամանակ նշել են մշակութային հուշարձանների անկախ մոնիտորինգի և քարտեզագրման նպատակով Լեռնային Ղարաբաղ փաստահավաք առաքելության գործուղման կարևորությունը։
«ՅՈՒՆԵՍԿՕ-ի փորձագիտական առաքելության հարցում Ադրբեջանի ապակառուցողական դիրքորոշումը հակասում է մշակութային ժառանգության պաշտպանության բնագավառում բոլոր միջազգային կոնվենցիաներին, այդ թվում՝ 1954 թվականի «Զինված ընդհարման դեպքում մշակութային արժեքների պաշտպանության մասին» կոնվենցիային»,- ընդգծել են ԱԳՆ-ում։
Բացի այդ, ԱԳՆ-ն նշում է, որ Բաքվի դիրքորոշումը խախտում է Արդարադատության միջազգային դատարանի 2021 թվականի դեկտեմբերի 7-ի հրատապ միջոցների մասին կիրառման որոշումը, որը պարտավորեցնում է Ադրբեջանին «ձեռնարկել բոլոր անհրաժեշտ միջոցները հայկական մշակութային ժառանգություն հանդեպ, ներառյալ եկեղեցիները, պաշտամունքի վայրերը, հուշարձանները, տեսարժան վայրերը, գերեզմանատները և արտեֆակտները վանդալիզմի և պղծման դեպքերը կանխելու և պատժելու համար»: