Եվս 100 օրինակ «Շուշի. մտաքարտեզներ» գրքի
- 20:47 04.12.2023
«Շուշի. մտաքարտեզներ» / «Shushi: Mental Maps» գրքի երկրորդ հրատարակության շնորհանդեսը տեղի ունեցավ այսօր Երևանում՝ «Էպիգրաֆ» գրախանութում։ Գիրքը հրատարակվել է Cultural & Social Narratives lab և Epigraph ընկերությունների նախաձեռնությամբ՝ Հայնրիխ Բյոլ հիմնադրամի աջակցությամբ։
Կազմակերպիչները նշել են. «Առաջին հրատարակությունը մեծ հաջողություն ունեցավ, ուստի որոշում կայացվեց երկրորդ հրատարակության մասին՝ 100 հատոր տպաքանակով։ Աճուրդի ընթացքում դրանք կվաճառվեն, իսկ ողջ հասույթը կուղղվի Արցախից բռնի տեղահանվածների կարիքները հոգալու համար»։
«Գիրքը ստեղծվել է 44-օրյա պատերազմից հետո։ Այն ուսումնասիրում և ներկայացնում է Շուշիի քաղաքային տարածքն ու առօրյան՝ հիմնված շուշեցիների հիշողությունների, անձնական պատմությունների և փորձի վրա: Գիրքը պարունակում է հոդվածներ, որոնք համակողմանիորեն վերլուծում են հիշողությունը, մանրամասն հարցազրույցներ շուշեցիների հետ, ինչպես նաև նրանց մտքում գծված քարտեզներ, որոնք նրանք փորձում են փաստագրել, վերստեղծել հիշողության մեջ և փրկել կորցրած քաղաքը մոռացությունից»։