Հեքիմյանի թաղ․ մեր պատուհանից եկեղեցին էր երեւում

Ստեփանակերտի Հեքիմյան թաղամասը գտնվում է մայրաքաղաքի ներքևի մասում, որը պայմանականորեն ժողովուրդը բաժանել է մի քանի մասի: Հեքիմյանի վերևի մասը անվանում էին «եկեղեցուն թաղը» կամ «տիվերի եկեղեցու թաղը» ի պատիվ այնտեղ գտնվող Սուրբ Հակոբ եկեղեցու: Եկեղեցու մոտ գտնվում էր «Էմբադա առևտրի կենտրոնը»՝ իր ամենամեծ սուպերմարկետով, որն անհնար էր դատարկ պատկերացնել, բայց շրջափակումը փոխեց ամեն ինչ:

Թաղամասի մեծ մասը բարձրահարկ շենքեր են, որտեղ ապրում էին հասարակ ստեփանակերտցիները: Երեխաները հաճախում էին մոտակա 10-րդ և 11-րդ դպրոցները, իսկ ազատ ժամանակ հավաքվում խաղում էին և նույնիսկ համերգներ էին կազմակերպում:

Շրջափակման ժամանակ բավականին բարդ էր, և բնակիչները  տարբեր հնարքներ էին փնտրում այն թեթևացնելու համար: Հեքիմյանի բնակիչ Ն.Բաղդասարյանը հիշում է, որ շրջափակման ժամանակ նրանք հարևաններով փայտե վառարան  էին դրել 8-րդ հարկում՝ ճաշ պատրաստելու համար:

Հարցին, թե ինչ կարող են պատմել իրենց թաղամասի մասին, պատասխանեց՝ «մեր պատուհանից եկեղեցին էր երևում և ես նայում էի եկեղեցուն ու աղոթում»:

Քրիստինե Ալավերդյան