Աբովյանում սկսեց գործել արցախցիների բացած առաջին կարատե-դո կենտրոնը
- 14:02 07.12.2023
Արցախի ավանդական կարատե-դո ֆեդերացիան դեկտեմբերի 1-ից վերսկսել է իր գործունեությունը ՀՀ Կոտայքի մարզի Աբովյան քաղաքում։ Բացվել է ավանդական կարատե-դո կենտրոնը, որը նաև այս մարտարվեստի առաջին ակումբն է Աբովյանում։ Ակումբի դռները բաց են բոլորի համար Հայաստանից՝ ներառյալ Արցախը։
Մարզիչ, Արցախի և Հայաստանի բազմակի չեմպիոն, Եվրոպայի չեմպիոն, աշխարհի փոխչեմպիոն, սև գոտի ունեցող Տիգրան Գեւորգյանի խոսքով, ակումբը բացվել է համախոհների համատեղ ջանքերով։ Նրա խոսքով՝ մեծ ներուժ կա այս մարզաձեւը պրոֆեսիոնալ մակարդակով զարգացնելու, որպեսզի երեխաները կարողանան մասնակցել ինչպես տեղական, այնպես էլ արտասահմանյան մրցաշարերին։ Նա հավելեց, որ Արցախի կարատե-դո ֆեդերացիան պատրաստել է Եվրոպայի և աշխարհի բազմաթիվ չեմպիոնների ու մրցանակակիրների, և այդ աշխատանքը շարունակվելու է Հայաստանում։
Արցախի կարատե-դո ֆեդերացիայի նախագահ Արամ Գևորգյանը նշեց, որ ավանդական կարատե-դոն տարբերվում է այլ մարտարվեստներից նրանով, որ սերմանում է համբերություն, կարգապահություն և տոկունություն, ինչը հատկապես գրավում է պատանի մարզիկների ծնողներին։ Կարևոր է, որ Հայաստանում լինի մի վայր, որտեղ բոլորը, ովքեր հետաքրքրված են կարատե-դոյով, կարողանան հավաքվել, և ֆեդերացիայի անդամները, ովքեր բախտի կամքով սփռված են ամբողջ Հայաստանով, կարող են գալ Աբովյան, ասաց նա։
Գևորգյանը հավելեց, որ համախոհների համատեղ ջանքերով ներդրումներ են կատարվել տարածքի վարձակալության և վերապատրաստման համար անհրաժեշտ սարքավորումների ձեռքբերման ուղղությամբ։ Ուստի ողջունելի է ցանկացած աջակցություն, որը կնպաստի կենտրոնի զարգացմանը։
Հայաստանի կարատե-դո ֆեդերացիան ակումբին տրամադրել է տատամի։ Ֆեդերացիայի ղեկավար Սուրեն Մաթևոսյանի խոսքով՝ իրենք պատրաստ են աջակցել ցանկացած նախաձեռնության, որը կծառայի այս մարտարվեստի զարգացմանը։
«Մենք աջակցում ենք բոլոր ջանքերին։ Հատկապես այս դժվարին ժամանակներում։ Արցախի Ֆեդերացիան չսպասեց, օգնություն չխնդրեց, անմիջապես գործի անցավ։ Ուստի մենք կշարունակենք համագործակցել և հնարավորինս աջակցել»,- ասաց Մաթևոսյանը։
Ալվարդ Գրիգորյան
