«Ձեր կառավարությունը չի դիտարկո՞ւմ, որ այս ամբողջի հիմնական մեղավորը՝ մեր թշնամի Ադրբեջանը որեւէ կերպ պետք է պատասխանատվություն կրի»

Արցախի կառավարության եւ դրա կողմից ստեղծված հիմնադրամների, ինչպես նաեւ Արցախի իրավաբանական եւ ֆիզիկական անձանց վերակառուցման ենթակա պարտավորությունները ՀՀ ֆինանսաբանկային համակարգի հանդեպ 2023 թվականի դեկտեմբերի 29-ի դրությամբ կկազմեն շուրջ 315 մլրդ դրամ: Հայաստանի կառավարությունն առաջարկում է 315 մլրդ դրամ պարտավորությունների վերջնական չափը վերակառուցել ՀՀ կառավարության եւ ֆինանսական կազմակերպությունների միջեւ։

ԱԺ նիստում «Հայաստան» խմբակցության պատգամավոր Թադեւոս Ավետիսյանն ասաց, որ այսպիսով, Հայաստանի կառավարությունը 210 մլրդ դրամով ավելացնում է պետական պարտքը։ «Ձեր կառավարությունը չի դիտարկո՞ւմ, որ այս ամբողջի հիմնական մեղավորը՝ մեր թշնամի Ադրբեջանը որեւէ կերպ պետք է պատասխանատվություն կրի, եւ դրա համար միջազգային մեխանիզմներ կան։ Ի՞նչ քայլեր են այս ուղղությամբ իրականացվում ի վերջո, որ նաեւ այդ հատուցման եւ փոխհատուցման խնդիրները կարգավորվեն։ Այնպես չէ, որ այդպես էլ պիտի լիներ, և՛ Հայաստանի կառավարությունը, և՛ ժողովուրդը պիտի դա փոխհատուցեր»,- ասաց Ավետիսյանը։

Ֆինանսների նախարար Վահե Հովհաննիսյանը նշեց․ «Եվ վստահ եմ, որ Հայաստանի Հանրապետությունը պատշաճ ջանքեր է իրականացնելու՝ այդ գումարների առնվազն մի մասը վերականգնելու ուղղությամբ»։