Իսահակյանի փողոց՝ Ստեփանակերտի բարի ու հյուրընկալ անկյուն
- 15:28 02.01.2024
Իսահակյանը Ստեփանակերտի հայտնի փողոցներից է։ Նրա բնակիչները միշտ բարեսիրտ ու հյուրընկալ են։ Յուրաքանչյուր մարդու, ով քայլում էր այս փողոցով, թվում էր, թե հայտնվել է հարազատ՝ ջերմ ու գողտրիկ անկյունում։
Փողոցի մեջտեղում նստարաններ կային, որտեղ հատկապես թոշակառուները սիրում էին իրենց հանգիստն անցկացնել։
Գրեթե բոլորն բակում ունեին շքեղ ծաղիկներ ու պտղատու ծառեր։ Փողոցը կատարյալ մաքուր էր։ Ավելին՝ բնակիչներն իրենք էին պահպանում մաքրությունը։
Հատկապես գարնանը դրսում զարմանալի բուրմունք էր։ Չնայած տեխնոլոգիական առաջընթացին, Իսահակյան փողոցում միշտ ակտիվ մթնոլորտ էր և երեխաները խաղում էին։
Փողոցի դիմաց հայտնի Արմանի վարսավիրանոցն էր, ինչպես նաև մթերային խանութները, որտեղ աշխատում էին բարի վաճառողուհիներ Լենան և Ինգան։ Փողոցում կար նաև գեղեցկության սրահ։ Վարսահարդար Նունեն պրոֆեսիոնալ էր աշխատում։
Նույնիսկ 44-օրյա պատերազմի ժամանակ շատերը չլքեցին իրենց տները՝ այնտեղ մնալով մինչև վերջ։ 2023 թվականի սեպտեմբերին՝ մինչև տեղահանությունը, տղամարդիկ հսկում էին փողոցը՝ պաշտպանելով բնակիչների խաղաղությունը։
Այժմ իսահակյանցիները ցրված են ողջ Հայաստանով մեկ, սակայն չեն կորցնում հայրենի Արցախ վերադառնալու հույսը։
Արսեն Աղաջանյան
