Այլ երկիր մեկնելիս անձնագրում կլոր կնիքն այլևս անհրաժեշտ չէ․ ինչ անել, եթե խնդիր առաջանա

Հայաստանի կառավարության կողմից ընդունված որոշման համաձայն՝ 2024 թվականի հունվարի 1-ից այլևս պարտադիր չէ ՀՀ քաղաքացիների հին նմուշի անձնագրերում օտարերկրյա պետություններում վավերականության մասին նշումը։ Անձնագրում վավերականության նշումը՝ հասարակության շրջանում առավել ընդունված կլոր կնիքն, այլևս  այլ պետություն մեկնելիս անհրաժեշտ չէ։ Օտար երկրում անձնագիրը համարվում է վավերական։

«Արմենպրես»–ի հետ զրույցում ՀՀ ԱԳ նախարարության հյուպատոսական վարչության վիզաների բաժնի պետ Արթուր Պետրոսյանը նշեց, որ այս փոփոխության արդյունքում քաղաքացիներն այլևս ստիպված չեն լինելու անձնագիրը ստանալուց հետո լրացուցիչ դիմել անձնագրային ծառայություններ կամ օտարերկրյա պետություններում ՀՀ դեսպանություններ, որ ապահովեն օտարերկրյա պետություններում վավերականության նշումը՝ կլոր կնիքը։ Դա էապես կթեթևացնի քաղաքացիների հոգսը։

«Դրանից բացի, նման նշում կատարելը վաղուց միջազգային պրակտիկայում չօգտագործվող միջոց է։ Հայաստանի կառավարությունը որոշեց ազատվել այս բաղադրիչից և ուղղակի ընդհանուր ժամկետի նշումով անձնագիրը համարեց վավերական։ Ինչպես գիտեք բիոմետրիկ անձնագրերում նման նմուշի անհրաժեշտություն չկա, հետևաբար ստացվում էր մի դեպքում՝ հին նմուշի անձնագրի պարագայում, լրացուցիչ վավերացման կարիք կար, իսկ մյուս դեպքում՝ բիոմետրիկի պարագայում, դա բացակայում էր։ Այս փոփոխությամբ, այդ իմաստով անձնագրերը դառնում են հավասար»,-ասաց Արթուր Պետրոսյանը։

Այս փոփոխության մասին ԱԳ նախարարությունը տեղեկացրել է ՀՀ-ում գործող բոլոր օտարերկրյա պետությունների դիվանագիտական ներկայացուցչություններին։ Դրանից բացի, այլ պետություններում գործող ՀՀ դեսպանություններն այս փոփոխությունների մասին տեղեկացրել են նստավայր, հավատարմագրված պետությունների բոլոր արտաքին գերատեսչություններին։ ԱԳՆ-ն նշված փոփոխության մասին հայտնել է նաև Օդային տրանսպորտի միջազգային ասոցիացիայի համապատասխան հարթակին, որից օգտվում են աշխարհի բոլոր օդանավակայանները, ավիափոխադրողները, սահմանային ծառայությունները։

«Քանի որ դեռ նախորդ տարվա հոկտեմբերից պատշաճ իրազեկում կատարել ենք, հույս ունենք, որ ճանապարհորդելիս խնդիրներ չեն առաջանա։ Ամեն դեպքում մեր քաղաքացիներին նման խնդիրներից պաշտպանելու համար ԱԳ նախարարության կայքում ստեղծվել է  հատուկ բաժին, որտեղ նշված փոփոխությունները մանրամասն ներկայացված են 3 լեզուներով։ Եթե ամեն դեպքում կլինի խնդիր, ապա մեր քաղաքացիները որպես առաջնային ապացուցողական միջոց կարող են հղում անել նախարարության պաշտոնական կայքին»,-ասաց նախարարության ներկայացուցիչը։

Հնարավորինս շատ քաղաքացիների իրազեկման համար, ԱԳ նախարարությունը ՀՀ-ում գործող 3 բջջային օպերատորների օգնությամբ sms հաղորդագրություն է ուղարկել բաժանորդներին։ Հաղորդագրությունը պարունակում է փոփոխության մասին տեղեկություն, ինչպես նաև ԱԳՆ կայքի այն հղումը, որտեղ 3 լեզվով մանրամասն նկարագրված է փոփոխությունը։ Նպատակն այն է, որ քաղաքացին հնարավորություն ունենա արագ գտնել այդ հղումը։

Ամեն դեպքում նախարարության պաշտոնական կայքում՝ առաջին էջի վրա, տեսանելի հատվածում դրված է փոփոխության մասին հաղորդագրությունը։