Արցախբանկը պետք է մարդկանց բացատրի իրավիճակը
- 18:21 16.01.2024
«Արցախբանկը» ստիպված է փոխել բանկային քարտերը, քանի որ արտաքսումից հետո Արցախի մասնաճյուղերը դադարեցրել են իրենց գործունեությունը և դրանց ծածկագրերն անվավեր են դարձել, Step1-ին ասաց բանկային մասնագետը։
«Արցախում Արցախբանկի յուրաքանչյուր մասնաճյուղ ուներ իր ծածկագիրը, ըստ որի կատարվում էին բանկային գործարքները։ Հայաստանում դրանք չեն գործում։ Բանկի հաճախորդները պետք է նոր բանկային հաշիվներ բացեն «Արցախբանկի» գլխամասային գրասենյակում կամ Հայաստանի մասնաճյուղերում, որպեսզի կարողանան դրամական փոխանցումներ ստանալ»:
Մասնագետը հավելեց, որ այլ բանկերի մասնաճյուղերը, որոնք գործել են Արցախում, գործել են նույն ծածկագրով, ինչ իրենց բանկերը Հայաստանում։
Նա նաև ենթադրություն արեց, որ այդպիսով պարզվում է՝ ներքին տեղահանվածը Հայաստանում է, թե լքել է երկիրը։
«Արցախբանկի քաղաքականությունը, ցավոք, առաջացրել է լրացուցիչ անհարմարություններ, դժգոհություններ և բազմաթիվ խոսակցություններ՝ ոչ հօգուտ բանկի։ Կարծում եմ՝ օգտակար կլիներ, եթե բանկը մամուլի միջոցով պաշտոնական հայտարարություն աներ՝ մանրամասն բացատրելով իրավիճակը։ Իհարկե, եթե բանկը մտահոգված է իր հեղինակությամբ եւ հաշվի է առնում մրցակցությունը»։