«Ալիեւն ասում է՝ դեռ երկու հոգի էլ Երեւանում կան». Փաշինյանը չպատասխանեց հարցին

«Պատերազմից հետո գերիներ ունեինք, ասացիք՝ պատրաստ եմ որդուս ուղարկել, Բաքու՝ գերիների դիմաց։ Հիմա էլ գերիներ ունենք, նաեւ Արցախի ռազմաքաղաքական ամբողջ ղեկավարությունը։ 2018, 2019, 2020 թվականներին նրանց գովում էիք, Շուշիում պարում, նրանց կենացը խմում։ Ալիեւն ասում է՝ դեռ երկու հոգի էլ Երեւանում կան։ Թե ինչու երկու, ոչ երեք, պարզ է։ Սա ազգային պետական խայտառակություն է, ձեր անձնական խայտառակությունը։ Ճիշտ չի՞ լինի հիմա էլ հայտարարեք, որ դուք եք պատրաստ հանձնվել Ալիեւին՝ գերիների դիմաց։ Մանավանդ Ալիեւը երգում է՝ «նե օլդու, Փաշինյան»»,- Ազգային ժողով-կառավարություն հարցուպատասխանի ժամանակ այսօր Նիկոլ Փաշինյանին դիմեց «Հայաստան» խմբակցության պատգամավոր Աղվան Վարդանյանը։

Նիկոլ Փաշինյանը չպատասխանեց հարցին։

ԱԺ նախագահ Ալեն Սիմոնյանը հորդորեց հարցը գրավոր ներկայացնել կառավարությանը։