«Վաղը Ադրբեջանը կարող է պատերազմ սկսել, քանի որ ասում է՝ չկա սահման, էլի 20 կմ առաջ կգա». Փաշինյանը կրկին չպատասխանեց
- 17:50 17.01.2024
Ազգային ժողով-կառավարություն հարցուպատասխանի ժամանակ այսօր «Հայաստան» խմբակցության պատգամավոր Արթուր Խաչատրյանը դիմեց Նիկոլ Փաշինյանին։
«Խաղաղության օրակարգը 2021 թվականից այլ իմաստ ստացավ, 2022 թվականին բյուրեղացավ որպես «զիջումներ, միայն թե կարողանամ Հայաստանի 29 800 քառակուսի կիլոմետրը պահել», թեկուզ ձեր նախընտրական ծրագիրը լրիվ ուրիշ բան էր։ 2023 թվականի մայիսին արդեն Արցախի նկատմամբ Ադրբեջանի գերիշխանությունն ընդունեցիք՝ չունենալով դրա իրավունքը, քանի որ Հայաստանում գործող օրենքներն այդ իրավունքը ձեզ չեն տալիս եւ Արցախից չունեիք լիազորում։ Բայց հիմնավորումը դա էր՝ Հայաստանի եւ Արցախի անվտանգությունն անհամատեղելի են, ստիպված եմ Արցախի հարցում գնալ զիջման՝ Հայաստանն ապահովագրելու համար։ Մի քանի օր առաջ Ալիեւն իր ծավալուն հարցազրույցի ժամանակ ասաց, որ ինքը պատրաստ չէ տարածքներ ճանաչել, սահմաններ ճանաչել, ինքն այլ ռեժիմ է առաջարկում, ճանապարհ է պահանջում Մեղրիով, այդ ռեժիմը, որն ինքը պահանջում է, միջանցքից չի տարբերվում։ Ստեղծվեց նոր իրավիճակ։ Ուզում եմ հասկանալ, այս նոր իրավիճակում ի՞նչ լուծում եք առաջարկում»,- ասաց նա։
Պատգամավորը հավելեց․ «Արցախի նկատմամբ ճանաչեցիք Ադրբեջանի գերիշխանությունը՝ ակնկալելով, որ Ադրբեջանը պատասխան քայլ կանի, բայց Ադրբեջանը դա չարեց։ Արդյունքում ի՞նչ ունենք՝ Հայաստանը ճանաչում է Արցախի նկատմամբ Ադրբեջանի գերիշխանությունը եւ ինչ-որ անհասկանալի 86,6 քառակուսի կմ։ Դուք ասում էիք՝ կտանք Արցախը, փոխարենն Ադրբեջանը կճանաչի սա, ճանապարհի հարցը կլուծենք։ Ադրբեջանն ասաց, որ ինքը դա չի ընդունում, ստացվեց, որ այս ամբողջ բանակցային գործընթացից Ադրբեջանը պոկեց ձեր ճանաչումը Ադրբեջանի տարածքային ամբողջականության, փոխարենը բացարձակապես ոչ մի բան չտվեց։ Ստեղծվել է լրիվ նոր իրավիճակ, Ադրբեջանը շարունակում է իր ագրեսիվ հռետորաբանությունը, երբեք Հայաստանի նկատմամբ այսքան ագրեսիվ չի խոսել, երբեք այսքան անհարգալից չի խոսել։ Այս ստեղծված իրավիճակում դուք ի՞նչ հակաքայլ եք առաջարկում, այդ «խաղաղության խաչմերուկը» լրիվ ուրիշ բան է։ Վաղը Ադրբեջանը կարող է պատերազմ սկսել, քանի որ ասում է՝ չկա սահման, էլի 20 կմ առաջ կգա։ Որակապես նոր անվտանգային իրավիճակ է ստեղծվել, կոնկրետ ի՞նչ հակաքայլ եք առաջարկում»։
Նիկոլ Փաշինյանն ի պատասխան ասաց․ «Ես կարծում եմ, որ այս իրավիճակում, ինչպես եւ նախկինում մեր դիրքորոշումները եւ մեր պաշտպանության գործոնը պետք է լինի լեգիտիմությունը, միջազգային իրավական լեգիտիմությունը՝ կապված սահմանի հետ, Հայաստանի տարածքային ամբողջականության եւ ինքնիշխանության հետ։ Այն գործողությունները, որոնք դուք ներկայացնում եք Լեռնային Ղարաբաղի տեսակետից, իրականում այդ գործողությունների կապը Հայաստանի ինքնիշխանության, տարածքային ամբողջականության եւ անվտանգության հետ է»։