Արցախցիների թոշակները վճարվելու են յուրաքանչյուր ամսվա մինչեւ 5-րդ օրը

«100 հազար դրամ աջակցության ծրագրի շրջանակներում այս պահի դրությամբ գումար է վճարվել Լեռնային Ղարաբաղից բռնի տեղահանված 112 080 անձի, 40+10 հազար դրամ ծրագրի շրջանակում հոկտեմբեր ամսվա համար վճարվել է 104 027 անձի, նոյեմբեր ամսվա համար՝ 77 503 անձի, 50 հազար դրամ աջակցության ծրագրի շրջանակում նոյեմբեր ամսվա համար 69 429 անձի է վճարվել, իսկ դեկտեմբեր ամսվա համար՝ 74 439 անձի»,- այսօր Ազգային ժողով-կառավարություն հարցուպատասխանի ժամանակ այսօր ասաց աշխատանքի եւ սոցիալական հարցերի նախարար Նարեկ Մկրտչյանը։

«Այս բոլոր վճարումները մենք իրականացնում ենք տարբեր բազաների համադրումների արդյունքում։ Կան դեպքեր, որ ֆիլտրեր ենք կիրառել։ Եվ այդ ֆիլտրերի կիրառումը որոշակի առումով հետաձգել է որոշ վճարումներ։ Բայց մենք մինչեւ ամսվա վերջ կվերջնականացնենք բոլոր այդ համադրումները տարբեր բազաների հետ, որը մենք իրականացնում ենք։ Եվ այդ ֆիլտրերի կիրառումը մեզ հնարավորություն է տվել չսխալվելու, օրինակ, 20 հազար մարդու տվյալների մասով։ Իսկ այսօր արդեն այս բոլոր ծրագրերի մասով վճարման է ուղարկվել ավելի քան 15 հազար մարդու վճարումներ։ Մենք նաեւ օրենքի առանձին փոփոխություն իրականացրինք, որպեսզի կարողանանք լիազորություն ունենալ՝ լուծելու կենսաթոշակների եւ նպաստների խնդիրը։ Լեռնային Ղարաբաղից բռնի տեղահանված 11 785 անձի վճարվել է կենսաթոշակ, կամ ծերության, հաշմանդամության, կամ կերակրողին կորցնելու դեպքում վճարները։ Գործընթացը շարունակական է, մենք կրկին բոլոր հայտերն ուսումնասիրում ենք, բազայի համադրումներն իրականացնում ենք եւ տրամադրում ենք»,- ասաց նա։

Ինչ վերաբերում է նպաստներին, նախարարը նշեց, որ 135 անձի նշանակվել է երեխայի միանվագ նպաստ, 191 անձի՝ մայրության նպաստ, 174 անձի՝ մինչեւ երկու տարեկան երեխայի նպաստ։ Այս ծրագրերի մասով եւս, նրա խոսքով, դիմումները շարունակվում են ընդունվել։

«Իսկ վերջնական համադրումների պատկերը կվերջնականացվի այս ամսվա վերջին»,- հավելեց նա։

Պատգամավոր Լիլիթ Մինասյանն ասաց, որ առնչվում է բազմաթիվ բողոքների։ «Խնդրահարույց դեպքերը շատ են, բայց մեծամասնությունը կապված է հենց կոմունիկացիոն խնդրի հետ։ Մարդը, օրինակ, չի հասկանում՝ իր աջակցությունն ինչո՞ւ տրամադրված չէ, անընդհատ մոտենում է Միասնական սոցիալական ծառայության աշխատակիցներին, պատասխան չեն կարողանում տալ մարդկանց։ Ես խնդրեմ, որ այն բազաները, որոնք մշակման փուլում են ու որոնց տեղեկատվությանը դուք տիրապետում եք, տիրապետի նաեւ այն առաջնային օղակը, որն այդ ինֆորմացիան պետք է մատուցի քաղաքացիներին»,- ասաց պատգամավորը՝ հորդորելով, որ կառավարությունը հստակ ժամկետներ ու օրեր նշանակի թոշակների ու աջակցության գումարների վճարման համար, որպեսզի մարդիկ ամեն օր չհարցնեն, թե երբ են ստանալու գումարը։

Նարեկ Մկրտչյանն արձանգանքեց, որ արցախցիների թոշակներն արդեն վճարվելու են յուրաքանչյուր ամսվա մինչեւ 5-րդ օրը։ Իսկ նպաստները կտրամադրվեն այն օրերին, որ օրերին տրամադրվում են ՀՀ քաղաքացիների նպաստները։