Իրանը մերժել է Միացյալ Նահանգների հետ բանակցությունների նոր փուլը

Իրանը հրաժարվել է մասնակցել Միացյալ Նահանգների հետ բանակցությունների երկրորդ փուլին, հաղորդում է իրանական IRNA պետական ​​լրատվական գործակալությունը։

«ԱՄՆ-ի չափազանցված պահանջները և անիրատեսական, անհիմն պնդումները, դիրքորոշման հաճախակի փոփոխությունները, մշտական ​​անհամաձայնությունները և այսպես կոչված [Հորմուզի նեղուցի] շարունակվող ծովային շրջափակումը, որը խախտում է հրադադարի համաձայնագիրը, ինչպես նաև սպառնալիքները մինչ օրս խոչընդոտել են բանակցությունների առաջընթացը, և այս պայմաններում արդյունավետ երկխոսության հեռանկար չկա», – ասվում է հայտարարության մեջ։

ԱՄՆ-ի և Իրանի միջև ապրիլի 8-ին ստորագրված ժամանակավոր հրադադարի ժամկետը լրանում է ապրիլի 21-ին։ Ապրիլի 19-ին նախագահ Դոնալդ Թրամփը հայտարարեց, որ Վաշինգտոնը իր բանակցողներին ուղարկել է Իսլամաբադ, որտեղ տեղի է ունեցել բանակցությունների առաջին փուլը։

Tasnim լրատվական գործակալությունը նույնպես հաղորդել է Թեհրանի կողմից բանակցություններից հրաժարվելու մասին. իրանցի բանակցողները մտադիր չեն միանալ երկրորդ փուլին, քանի դեռ ԱՄՆ-ն պահպանում է Հորմուզի նեղուցի շրջափակումը։

Եթե Իրանը չհամաձայնի ԱՄՆ-ի կողմից առաջարկված գործարքին, ԱՄՆ զինված ուժերը կանջատեն Իրանի բոլոր էլեկտրակայաններն ու բոլոր կամուրջները, գրել է նախագահ Դոնալդ Թրամփը Thruth Social սոցիալական ցանցում։

«Բավական է լավ տղաներ լինելը։ Նրանք [Իրանը] արագ կհանձնվեն, հեշտությամբ կհանձնվեն, և եթե նրանք չընդունեն գործարքը, ես պատիվ կունենամ անել այն, ինչ անհրաժեշտ է, այն, ինչ պետք է անեին Իրանի մյուս նախագահները վերջին 47 տարիների ընթացքում։ Ժամանակն է վերջ դնել Իրանի ոչնչացման այս մեքենային», – հայտարարեց նախագահը։