Լիաննա Պետրոսյանը բրիտանական լրագրողներին է ներկայացրել արցախցիների խնդիրները
- 22:50 08.05.2026
Օրերս մեր գրասենյակում հյուրընկալել ենք բրիտանական և միջազգային հեղինակավոր լրատվամիջոցների, պարբերականների, առաջատար վերլուծական հարթակների և ռազմավարական հաղորդակցությունների ոլորտի մեկ տասնյակ ներկայացուցիչների։
Հյուրերին ներկայացրել եմ Արցախից բռնի տեղահանված մեր հայրենակիցների սոցիալական, իրավական և հումանիտար խնդիրները։
Հատուկ անդրադարձ է կատարվել 2020 և 2023 թվականների տեղահանություններին, Ադրբեջանի կողմից Արցախում կատարված վայրագություններին, խոշտանգումներին, մեր միջազգային իրավունքների պաշտպանությանը, գերեվարված և պատանդառված անձանց ազատ արձակման հարցերին:
Նման հանդիպումները և հարցազրույցները կարևոր են միջազգային հանրության շրջանում Արցախից բռնի տեղահանվածների իրական վիճակի, առկա խնդիրների ու միջազգային իրավունքների իրացման վերաբերյալ իրազեկվածության բարձրացման համատեքստում։
Հանդիպման ավարտին հյուրերը ծանոթացել են նաև մեր կողմից հիմնադրված արցախցիների տեղեկատվական, խորհրդատվական աջակցման կենտրոնի գործունեությանը, թեժ գծի աշխատանքներին, քաղաքացիների ընդունելության և սպասարկման գործընթացներին։