Ի՞նչ է փոխվել երեք օրում։ ԱՄՆ-ն շտապ ստորագրել է TRIPP համաձայնագիրը
- 13:07 04.06.2026
ԹՐԻՓՓ-ի վերաբերյալ ՀՀ-ԱՄՆ համաձայնագիրը ստորագրվեց: Այս մասին տեղեկացնում են ՀՀ ԱԳՆ-ից:
«Վայրկյաններ առաջ ձեր աչքի առջև ստորագրեցի TRIPP-ի վերաբերյալ Հայաստան-ԱՄՆ շրջանակային համաձայնագիրը: Հիշում եք՝ օրեր առաջ այն նախաստորագրվել էր իմ և ԱՄՆ պետքարտուղար Մարկո Ռուբիոյի կողմից:
Հիմա պետքարտուղար Ռուբիոն իր ստորագրություններն է դրել համաձայնագրի տակ, և առաքվել է փաստաթուղթը Հայաստան: Այժմ ես էլ հայկական կողմի ստորագրությունները դրեցի: Սրանով հեռավար ստորագրման գործընթացն ավարտված է, և համաձայնագիրը պատրաստ է վավերացման»,- ասել է ՀՀ ԱԳ նախարար Արարատ Միրզոյանը:
Մի քանի օր առաջ ԱՄՆ պետքարտուղար Մարկո Ռուբիոն, որը մեկ ժամյա այցով ժամանել էր Երևան, անմիջապես չստորագրեց TRIPP համաձայնագիրը, այլ միայն նախաստորագրեց այն։ Այնուհետև նա թռավ ԱՄՆ և հանկարծ ստորագրեց փաստաթուղթը, չնայած ենթադրվում էր, որ ԱՄՆ-ն կհետաձգի վերջնական ստորագրումը մինչև Հայաստանի ընտրություններից հետո, որոնք տեղի կունենան երկու օրից։
Ի՞նչ է փոխվել այս երեք օրերի ընթացքում, և ինչո՞ւ է ամեն ինչ այդքան շտապողական արվում։ Շատ հավանական է, որ այս շտապողականությունը կապված է ոչ այնքան Հայաստանի ընտրությունների, որքան իրանական կարգավորման հետ։ Թրամփը հայտարարել է, որ ԱՄՆ-ի և Իրանի միջև համաձայնագրի ստորագրումը, հավանաբար, տեղի կունենա այս շաբաթավերջին։ Երեկ ԱՄՆ Ներկայացուցիչների պալատը սահմանափակեց Թրամփի ռազմական գործողությունները Իրանում, և խաղաղության համաձայնագիրը թվում է ավելի ու ավելի հավանական։
Իրանի հետ համաձայնագրի ստորագրումը ենթադրում է հաղորդակցությունների բացում, և ԱՄՆ-ն ապահովագրում է իր խաղադրույքները՝ վերահսկողություն հաստատելով հայ-իրանական սահմանի ամբողջ երկանքով։