«Մուսուլմանական ՆԱՏՕ». Պակիստանը հետաքրքրված է Հայաստանով
- 15:29 07.08.2026
Թուրքիան, Սաուդյան Արաբիան և Պակիստանը պայմանագիր են կնքել ռազմական դաշինք՝ այսպես կոչված «մուսուլմանական ՆԱՏՕ» ստեղծելու վերաբերյալ։
Փաստաթուղթն այսօր Ռիադում ստորագրել են Թուրքիայի նախագահ Ռեջեփ Թայիփ Էրդողանը, Սաուդյան Արաբիայի թագաժառանգ Մուհամմեդ բին Սալմանը և Պակիստանի վարչապետ Շահբազ Շարիֆը։
Համաձայնագրի հիմնական դրույթը կոլեկտիվ պաշտպանությունն է։
Երեք պետություններից մեկի դեմ ցանկացած զինված հարձակում կհամարվի հարձակում երեքի դեմ։ Կողմերը նախատեսում են զարգացնել ռազմատեխնիկական համագործակցությունը, համակարգել տարածաշրջանային ճգնաժամերի լուծման ջանքերը, այդ թվում՝ Մերձավոր Արևելքում, և փոխանակել հետախուզական տեղեկատվություն։
Փաստաթղթի ստորագրումից երկու օր առաջ Մոսկվայում Պակիստանի դեսպան Ֆեյսալ Նիազ Թիրմիզին TASS-ին տված հարցազրույցում հայտարարել է, որ Իսլամաբադը մեծ նշանակություն է տալիս Մոսկվայի, Երևանի և Բաքվի հետ «կապի» ամրապնդմանը։
Մեկնաբանելով Պակիստանի և Հայաստանի միջև դիվանագիտական հարաբերությունների հաստատումը՝ Բաքվի և Երևանի միջև լարվածության կարգավորման ֆոնին, նա նշել է. «Մենք երկար տարիներ դիվանագիտական հարաբերություններ չենք ունեցել Հայաստանի հետ, և ես շատ ուրախ եմ, որ վերջին իրադարձությունները հանգեցրին Հայաստանի հետ նորմալ շփումներ հաստատելու անհրաժեշտության ճանաչմանը: Պատմականորեն Կովկասյան տարածաշրջանի և Պակիստանի միջև կան հսկայական կապեր: Ես տեսնում եմ բազմաթիվ հեռանկարներ Պակիստանի, Հայաստանի և ամբողջ կովկասյան տարածաշրջանի միջև:
Ես նաև եղել եմ Դուբայում: Այնտեղ բազմաթիվ ամուսնություններ են տեղի ունեցել հայերի և պակիստանցիների միջև», – նշել է դիվանագետը:
Ֆեյսալ Նիյազ Թիրմիզին նշել է. «Մենք պատմական կապեր ունենք Կովկասի հետ: Եվ Հայաստանը դրանց շատ կարևոր բաղադրիչն է», – եզրափակել է նա: