Իրանը պնդում է, որ կարող է դիմակայել ԱՄՆ-ի «դժոխային պատժամիջոցներին»
- 19:15 23.08.2026
Թրամփը չի բացահայտել Իրանի դեմ նոր «դժոխային» պատժամիջոցների մանրամասները, սակայն նշել է, որ «ցանկացած երկիր, որը թույլ կտա իր ֆինանսական հաստատություններին, բիզնեսներին, օդանավակայաններին կամ պետական գործակալություններին կենսականորեն կարևոր աջակցություն ցուցաբերել Իրանին, կբախվի հսկայական տնտեսական հետևանքների»։
Թրամփի հայտարարությունից մեկ օր անց լրագրողները հարցրել են ֆինանսների նախարար Սքոթ Բեսենթին, թե ինչ նոր պատժամիջոցներ կկիրառվեն Իրանի դեմ, սակայն նա չի մանրամասնել։ «Դա կրկնակի հարված է։ Մենք շրջափակում ենք սահմանել [իրանական նավահանգիստների], և մենք պատրաստվում ենք կիրառել պատմության մեջ ամենախիստ պատժամիջոցները», – ասել է Բեսենթը CNBC-ին տված հարցազրույցում։ «Դա կաշխատի Իրանում, և մենք կտապալենք այդ ռեժիմը»։
Միացյալ Նահանգները սպասում էր, որ Իրանը արագ «կփլուզվի, ինչպես Վենեսուելան», բայց «դա տեղի չունեցավ Իսլամական Հանրապետության դիմադրողականության պատճառով», հայտարարել է Իրանի նախագահ Մասուդ Պեզեշկիանը։ Պեզեշկիանը հավելել է, որ իրանցի ժողովուրդը կդիմանա երկրի դեմ «ամենասարսափելի պատժամիջոցներին»։
Իրանը հրավեր է ստացել միանալու Մեքքայի համաձայնագրերին՝ Սաուդյան Արաբիայի, Թուրքիայի և Պակիստանի միջև կոլեկտիվ պաշտպանության համաձայնագրին։ Այս մասին «Ալ Մայադին»-ին տված հարցազրույցում հայտարարել է Իրանի խորհրդարանի մամուլի ծառայության ղեկավար Մեհդի Ռահիմին։
Ռահիմիի խոսքով՝ Իրանի իշխանությունները ներկայումս վերանայում են առաջարկը։ Նա պնդում է, որ տարածաշրջանային երկրների միջև «անվտանգության հովանոց» ստեղծելու ցանկությունը «Իրանի հաղթանակն է»։ Ռահիմիի պնդմամբ՝ Թեհրանը վաղուց է կոչ անում դրան։
Նա նաև ընդգծել է, որ ցանկացած երկիր, որը կօգնի ԱՄՆ-ին Իրանի հետ հակամարտության մեջ, գին կվճարի։