«Այն, որ արցախցիները զանգվածաբար լքում են Հայաստանը, ՀՀ իշխանությունների ապակառուցողական քաղաքականության արդյունքն է»
- 09:44 16.02.2024
Վերջին ամիսներին ցամաքային և օդային ճանապարհով Հայաստանից հեռացել է ավելի քան 40 հազար մարդ։
Լեռնային Ղարաբաղի Ազգային ժողովի առաջին և երկրորդ գումարման պատգամավոր Աշոտ Սարգսյանի տվյալներով, նրանցից մոտ 30 հազարը կարող են լինել արցախցիներ։ Նա հավելեց, որ ՀՀ կառավարության ներկայացրած պաշտոնական վիճակագրությունը ներառում է միայն գնված ավիատոմսերի քանակը։
«Այն, որ արցախցիները զանգվածաբար լքում են Հայաստանը, Հայաստանի իշխանությունների ապակառուցողական քաղաքականության արդյունքն է։ Նրանք ամեն ինչ անում են, որ արցախցիները հեռանան Հայաստանից՝ դրանով իսկ փակելու համար Արցախի հարցը։ Հայաստանի իշխանությունները հասարակության մեջ կոնֆլիկտ են ստեղծում՝ օգտագործելով սոցիալական խնդիրները»։
Սարգսյանն ասաց, որ կառավարության որոշումները վկայում են այն մասին, որ պետական շահերը չեն նույնացվում ազգայինի հետ։
«Ազգը ստեղծարար է այնտեղ, որտեղ համընկնում են պետական և ազգային շահերը։ Իսկ այստեղ ազգային շահերի հաշվին փորձում են պահպանել պետական շահերը։ Ազգային ունեցվածքը Հայաստանի իշխանության ձեռքում է՝ պատմական հայկական հողերն ու ժողովուրդը։ Եվ դրանք պահպանելու փոխարեն հեշտությամբ հրաժարվում են իրենց տարածքներից՝ միաժամանակ ոչնչացնելով գենոֆոնդը։ Միաժամանակ բոլոր ջանքերը գործադրելով կեղծ թեզերով ու շանտաժով ժողովրդին մոլորեցնելու համար՝ ազդում են նրա հոգեկանի վրա»։
Ալվարդ Գրիգորյան