Անօդաչու սարքը գրոհել է Գրոզնիում ՆԳՆ հատուկ գնդի զորանոցը
- 13:01 12.12.2024
Գրոզնիում հարձակում է իրականացվել անօդաչու թռչող սարքի միջոցով, որի թիրախը Ռուսաստանի հերոս Ախմաթ Կադիրովի անվան ոստիկանական գնդի զորանոցն էր՝ Չեչնիայում գտնվող ՌԴ ՆԳՆ գունդը։
Հինգշաբթի օրը՝ դեկտեմբերի 12-ի առավոտյան, Չեչնիայի ղեկավար Ռամզան Կադիրովը Telegram-ում հայտնել է, որ անօդաչու թռչող սարքը խփվել է օդում, ինչի հետևանքով այն պայթել է, վնասվել է շենքի տանիքը և կոտրվել ապակիները, ինչպես նաև առաջացել է փոքր հրդեհ։
«Ոչ ոք լուրջ չի տուժել։ Չորս պահակային զինծառայող թեթեւ վնասվածքներ են ստացել։ Այդ ժամանակ հերթապահ անձնակազմը գտնվում էր նման հարձակումներից պաշտպանված տարածքներում»,- պնդում է նա։ Կադիրովը հարձակման մեջ մեղադրել է Ուկրաինային։
Նա ասաց, որ Չեչնիայից 84 հազար կամավորներ և պահեստազորը պատրաստ է «առաջին հրամանով» մեկնել առաջնագիծ։