Ուկրաինական լիթիում և հայկական TRIPP. война войной, а обед по распорядку
- 12:08 13.01.2026
Ուկրաինան Կիրովոգրադի մարզի Դոբրա հանքավայրում լիթիումի արդյունահանման իրավունքը շնորհել է Dobra Lithium Holdings ներդրողների խմբին, որը կապված Միացյալ Նահանգների հետ: Ուկրաինայի վարչապետ Յուլիա Սվիրիդենկոն երկուշաբթի՝ հունվարի 12-ի երեկոյան Telegram-ի միջոցով հայտարարել է լիթիումի հանքավայրի շահագործման մրցույթի հաղթողի մասին:
Ըստ The New York Times (NYT)-ի՝ ամերիկյան խմբի ներդրողներից մեկը միլիարդատեր Ռոնալդ Ս. Լոդերն է, կոսմետիկայի կայսրության ժառանգորդը և ԱՄՆ նախագահ Դոնալդ Թրամփի անձնական ընկերը։
Հիշեցնենք, որ Ուկրաինան և Միացյալ Նահանգները ստորագրել են համաձայնագիր, որով ուկրաինական հազվագյուտ մետաղների արդյունահանման իրավունքը փոխանցվել է Միացյալ Նահանգներին։ Եվ թեկուզ պատերազմը շարունակվում է, Միացյալ Նահանգները ապահովում է ուկրաինական լիթիումի նկատմամբ իր իրավունքները։
Ի դեպ, նույնը տեղի է ունենում նաև Հայաստանում, որտեղ Իրանում անկայունության ֆոնին ակտիվորեն քննարկվում է հայ-իրանական սահմանին «Թրամփի ճանապարհը»։
Միացյալ Նահանգների առևտրի և զարգացման գործակալության (USTDA) տարածաշրջանային տնօրեն Կարլ Կրեսի ղեկավարած պատվիրակությունը Բաքվից կայցելի Հայաստան, հայտնել է Երևանում ԱՄՆ դեսպանատունը: Պատվիրակությանը Բաքվում երեկ ընդունել էր Ադրբեջանի փոխարտգործնախարար Էլնուր Մամեդովը: Ամերիկյան և ադրբեջանական կողմերը քննարկել էին «Թրամփի ուղի» նախագծի իրագործման հեռանկարները։
Հունվարի 13-14-ը ՀՀ ԱԳ նախարար Արարատ Միրզոյանն աշխատանքային այցով կգտնվի ԱՄՆ-ում. Այցի ծրագրում ներառված է հանդիպում ԱՄՆ պետքարտուղար Մարկո Ռուբիոյի հետ։
Հայաստանի ԱԳՆ–ից հայտնում են, որ նախատեսվում է «ԹՐԻՓՓ»-ի կենսագործման շրջանակի վերաբերյալ համատեղ հայտարարություն: