Հարձակումներ նավթի և գազի վրա. էներգետիկ հեղափոխություն ներքևի՞ց
- 09:57 19.03.2026
ԱՄՆ նախագահ Դոնալդ Թրամփը իր Truth Social կայքում հրապարակել է Իրանի Հարավային Պարս գազի հանքավայրի վրա հարձակման մասին ծավալուն գրառում։ Նա գրում է, որ ԱՄՆ-ն «ոչինչ չգիտեր» Իսրայելի հարձակման մասին, բայց եթե Իրանը կրկին թիրախավորի Կատարին, Վաշինգտոնը կպատասխանի։
Թրամփի խոսքով՝ Իսրայելը հարվածել է հանքավայրին «զայրույթից դրդված» և վնասել «ամբողջի համեմատաբար փոքր մասը»։ Այնուհետև Իրանը, որը «ոչինչ չգիտեր», պատասխանել է՝ հարձակվելով Կատարի Ռաս Լաֆանում գտնվող հեղուկ բնական գազի գործարանի վրա, որը ԱՄՆ նախագահը անվանել է «անարդարացի»։
Թրամփը խոստանում է, որ Իսրայելը այլևս չի հարձակվի Հարավային Պարսի վրա՝ անվանելով հանքավայրը «չափազանց կարևոր և արժեքավոր»։
Սակայն եթե Իրանը հարձակվի Կատարի վրա, ԱՄՆ-ն «կպայթեցնի» այն «այնպիսի ուժով, որը Իրանը երբեք չի տեսել»։
Իսրայելի և ԱՄՆ-ի միջև Իրանի դեմ պատերազմը հասել է նոր մակարդակի՝ հարվածներ են հասցվում նավթի և գազի ենթակառուցվածքներին, որոնից կախված են համաշխարհային մատակարարումներն ու գները: Մասնագետները զգուշացնում են որոշակի ուժերի կողմից Մերձավոր Արևելքի նավթի և գազի ենթակառուցվածքները ոչնչացնելու մտադրության մասին: Եթե ավելացրեք դրան Ուկրաինայի հարվածները ռուսական նավթի և գազի օբյեկտներին, ինչպես նաև Իսրայելի հարվածը Կասպից ծովում գտնվող իրանական օբյեկտին, կարող է թվալ, թե նավթարդյունաբերությունը, որի շուրջ կառուցվել է համաշխարհային կարգը 100 տարի շարունակ, ամբողջությամբ պայթեցվում է:
Եվրոպական երկրները շտապ վերադառնում են միջուկային էներգիային՝ քննարկելով մոդուլային կայանների կառուցման հարցը, այլ ոչ թե մեծ ատոմակայանների՝ բրածո վառելիքը փոխարինելու համար: