Սաուդյան Արաբիան առաջարկում է Իրանի և Մերձավոր Արևելքի երկրների միջև չհարձակման պայմանագիր կնքել

Սաուդյան Արաբիան առաջարկել է պատերազմից հետո Իրանի և Մերձավոր Արևելքի պետությունների միջև չհարձակման մասին պայմանագիր կնքել, հաղորդում է Financial Times-ը՝ հղում անելով բանակցություններին ծանոթ աղբյուրներին։

Հրապարակման համաձայն՝ գաղափարը հիշեցնում է 1975 թվականի Հելսինկյան համաձայնագրերը, որոնք ստորագրվել են ԱՄՆ-ի, Խորհրդային Միության և եվրոպական երկրների կողմից։ Դրանք նախատեսված էին Սառը պատերազմի ժամանակ լարվածությունը նվազեցնելու համար։

FT-ի աղբյուրների համաձայն՝ արաբական պետությունների մեծ մասը աջակցում է նման նախաձեռնությանը։ Տարածաշրջանի երկրները վախենում են, որ նույնիսկ պատերազմից թուլացած Իրանը կմնա սպառնալիք տարածաշրջանի համար։ Թեհրանն ինքը նույնպես հետաքրքրված է նման համաձայնագրով, քանի որ վաղուց առաջ է քաշել այն գաղափարը, որ տարածաշրջանային երկրները պետք է լուծեն իրենց անվտանգության հարցերը առանց Արևմուտքի միջամտության։

FT-ի տվյալներով՝ մի շարք եվրոպական առաջնորդներ արդեն ողջունել են Ռիադի առաջարկը և կոչ են արել Պարսից ծոցի երկրներին աջակցել դրան։