Axios. Իրանը և ԱՄՆ-ն համաձայնության են եկել, Թրամփը դեռ չի ստորագրել, բայց նավթի գներն արդեն «ընկել են»
- 20:11 28.05.2026
ԱՄՆ-ի և Իրանի բանակցողները համաձայնության են եկել 60-օրյա հուշագրի շուրջ՝ հրադադարի և միջուկային բանակցությունների մեկնարկի վերաբերյալ, սակայն ԱՄՆ նախագահ Դոնալդ Թրամփը դեռևս վերջնական հաստատում չի տվել դրան, հաղորդում է Axios-ը։
ԱՄՆ պաշտոնյաների տվյալներով՝ հուշագիրը նախատեսում է «անսահմանափակ» անցում Հորմուզի նեղուցով՝ առանց իրանական ուժերի կողմից մաքսատուրքերի և կալանավորումների։ Իրանի արտաքին գործերի նախարարությունը հայտարարել է, որ իրանական կողմը չի գանձի տարանցիկ վճարներ նավերից, սակայն նավատերերը ստիպված կլինեն վճարել անվտանգության, շրջակա միջավայրի պաշտպանության և ծովային կառավարման ծախսերի համար։
Axios-ի տվյալներով՝ փաստաթուղթը կներառի Իրանի կողմից միջուկային զենք չմշակելու պարտավորություն։ Զրուցակիցները նշել են, որ Իրանի բարձր հարստացված ուրանի հեռացումը կլինի բանակցությունների առաջին թեմաներից մեկը։
Լոնդոնի ICE Futures բորսայում օգոստոսյան Brent նավթի ֆյուչերսների գինը նվազել է 1.6%-ով՝ հասնելով 90.79 դոլարի մեկ բարելի համար, որը հինգշաբթի՝ մայիսի 28-ին, իր ամենացածր գնին էր, ըստ Մոսկվայի ժամանակով ժամը 17:13-ի դրությամբ առևտրի տվյալների։ Ապրիլի 17-ից ի վեր նավթի գինը մեկ բարելի համար 91 դոլարից ցածր չի եղել։