Հայ Առաքելական եկեղեցու Արցախի թեմի թեմական խորհրդի հայտարարությունը
- 17:39 02.12.2025
Հայ Առաքելական եկեղեցու Արցախի թեմի թեմական խորհուրդը հայտարարել է, որ չի կիսում Արցախի թեմի առաջնորդ Վրթանես եպիսկոպոս Աբրահամյանի վերջին դիրքորոշումն ու վարքագիծը, որոնք արդարացի դժգոհություն և զայրույթ են առաջացրել ժողովրդի շրջանում։
Այս մասին «Ապառաժ»-ին հայտնել է թեմական խորհրդի ատենապետ Լեռնիկ Հովհաննիսյանը։
Վրթանես եպիսկոպոս Աբրահամյանը անցած օրերին մի խումբ բարձրաստիճան հոգևորականների հետ հանդիպել էր Նիկոլ Փաշինյանի հետ, իսկ նոյեմբերի 29-ին նույն խմբով հանդես էին եկել Ամենայն Հայոց կաթողիկոսի նոր ընտրությունների անցկացման պահանջով։
Լեռնիկ Հովհաննիսյանի խոսքով՝ նոյեմբերի 28-ին թեմական խորհրդի անդամները հանդիպել են առաջնորդին և հորդորել հանդես գալ հստակ հայտարարությամբ ու ներողություն խնդրել Ատցախի բռնագաղթված ժողովրդից։
Սակայն, նրա հավաստիացումներին հակառակ, հրապարակված հայտարարությունում ներողության որևէ ձևակերպում չի եղել։
Ատենապետը նշել է, որ թեմի առաջնորդը փաստացի հրաժարվել է ներողամտություն հայցել և իր հաջորդ հայտարարություններով միայն խորացրել է ժողովրդական վրդովմունքը։ Նա ընդգծել է, որ առաջիկայում թեմական խորհուրդը հանդես կգա իր հստակ պաշտոնական դիրքորոշմամբ։
Հովհաննիսյանը նաև անընդունելի է համարել Արցախի թեմի պաշտոնական կայքի օգտագործումը թեմին չվերաբերող հոգևորականների հայտարարությունների տարածման համար։