Հայաստանը 29 743 քառ․ կմ է՞․ պատրա՞ստ եք դատարանում դա պնդել
- 08:32 23.12.2025
Մի հարց նրանց, ովքեր ընդունում են նիկոլական թեզը, որ Հայաստանը 29 743 քառ կմ է։ Այս հայեցակարգը նշանակում է, որ ՀՀ ոչ թե ազատագրել, այլ օկուպացրել է Ադրբեջանի տարածքը։ Ադրբեջանը տարածքի այդ “օկուպացիայի” համար 150 միլիարդ դոլար փող է ուզում։ (Տասն անգամ ավելի շատ, քան ՀՀ ներկայիս տխրահռչակ պարտքը։) Դրա մասին Ալիևը ԲԱԶՄԻՑՍ ՊԱՇՏՈՆԱՊԵՍ հայտարարել է։ Դրա վերաբերյալ 2023թ․-ից Ադրբեջանի երկու հայցադիմում կա Իրավարարության միջազգային դատարանում ՀՀ դեմ։
Հիմա հարցը – ինչի՞ վրա եք խարսխելու ՀՀ պաշտպանությունը դատարանում։ Միակ հնարավորությունը՝ դատարանում ապացուցել, որ Արցախը ԵՐԲԵՔ de jure չի եղել Ադրբեջանի տարածք, այսինքն ՉԿԱ որևէ ՄԻՋԱԶԳԱՅԻՆ ԻՐԱՎԱԿԱՆ փաստաթուղթ, որով Ադրբեջանի տիտղոսը ամրագրվել է Արցախի և Նախիջևանի վրա։
Միայն չասեք, որ դա կհանգեցնի պատերազմի։ Պատերազմի է հանգեցնելու դատական այն որոշումը, որը կհաստատի Ադրբեջանի տարածքի օկուպացիան ՀՀ կողմից և հատուցման վճարների գաձումի վճիռը։ Քանի որ ՀՀ-ն ի վիճակի չի լինելու դա վճարելու, ուրեմն Ադրբեջանը լրիվ լիգիտիմ հիմք է ստանալու դա գանձել Սյունիքի ոսկու, մոլիբդենի, երկաթի ու ուրանի հանքերով և Սևանի ջրով, ինչպես նաև մի քանի հազար քառակուսի կմ արոտավայրերով։ Ահա որտեղ է պատերազմի սաղմը։
Նաև չասեք՝ կողմերը պարտավորվել են միջազգային դատական մարմիններից հետ կանչել իրենց հայցերը։ Մինչև դատական վճիռները չլինեն, Ադրբեջանը ոչ մի խաղաղության համաձայնագիր չի վավերացնի։