Թրամփը հայտարարեց Լիբանանում հրադադարի մասին
- 22:08 16.04.2026
ВВС
ԱՄՆ նախագահ Դոնալդ Թրամփը հինգշաբթի օրը հայտարարեց, որ Իսրայելի և Լիբանանի առաջնորդները համաձայնել են հայտարարել հրադադարի ռեժիմ հինգշաբթի կեսգիշերից։
«Ես հենց նոր հիանալի զրույցներ ունեցա Լիբանանի պատվարժան նախագահ Ջոզեֆ Աունի և Իսրայելի վարչապետ Բիբի Նեթանյահուի հետ։ Այս երկու առաջնորդները համաձայնել են պաշտոնապես հայտարարել 10-օրյա հրադադար՝ իրենց երկրների միջև խաղաղության հասնելու շահերից ելնելով», – գրել է Թրամփը իր Truth Social ցանցում։
ԱՄՆ նախագահը պնդում է, որ հրադադարը կհայտարարվի արևելյան ժամանակով ժամը 17:00-ին, կամ տեղական ժամանակով կեսգիշերին։
Թրամփը հիշեցրել է, որ երեքշաբթի օրը Միացյալ Նահանգներում տեղի են ունեցել Իսրայելի և Լիբանանի ներկայացուցիչների միջև 34 տարվա ընթացքում առաջին պաշտոնական բանակցությունները, և հայտարարել է, որ հանձնարարել է պետքարտուղար Մարկո Ռուբիոյին, փոխնախագահ Ջ.Դ. Վենսին և Շտաբների պետերի միացյալ կոմիտեի նախագահ Դեն Ռեյզինին «աշխատել Իսրայելի և Լիբանանի հետ՝ երկարատև խաղաղության հասնելու համար»։
Թրամփը հավելեց, որ կհրավիրի Աունին և Նեթանյահուին Սպիտակ տուն։
Լիբանանում հրադադարը Իրանի պահանջներից մեկն էր Միացյալ Նահանգների հետ բանակցություններում։ Այս բանակցությունները սկսվել են շաբաթավերջին Պակիստանի Իսլամաբադում, սակայն առաջին հանդիպումն ավարտվել է անհաջողությամբ։
Իսրայելը Լիբանանում պատերազմ է մղում «Հեզբոլլահի» դեմ։
«Հեզբոլլահը» ներկայացնող լիբանանցի պատգամավոր Իբրահիմ ալ-Մուսավին AFP-ին ասել է, որ խումբը կպահպանի հրադադարը, եթե Իսրայելը դադարեցնի իր հարձակումները։