Թուրք նախարարը անկեղծ չէ. խնդիրնը ոչ թե Արցախն է, այլ Կարսն ու Արդահանը

APA-ի թուրքական բյուրոյի հաղորդմամբ՝ Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է Հայաստանի հետ երկաթուղային և ճանապարհային սահմանային անցակետերի բացման նախապատրաստական ​​աշխատանքների ավարտի մասին։

Ուրալօղլուն նշել է, որ եթե համաձայնության հասնեն՝ հաշվի առնելով Ադրբեջանի համար կարևոր հարցերը, գործընթացը երկար չի տևի։

Թուրք նախարարը հույս է հայտնել, որ սահմանային անցակետերը կբացվեն մոտ ապագայում։

«Կարևոր հարցեր» ասելով Թուրքիան նկատի ունի Հայաստանի կողմից նոր Սահմանադրության ընդունումը և  Ադրբեջանի ու Թուրքիայի հետ Հայաստանի խորհրդային սահմանների ճանաչումը որպես օրինական։

Ներկայումս հայ-թուրքական սահմանը իրավական կարգավիճակ չունի. այն մինչ օրս մնում է թուրք-խորհրդային սահման, որը սահմանվել է 1921 թվականի Կարսի պայմանագրով և՝ ըստ հայ-ռուսական պայմանագրի, պահպանվում է ռուս սահմանապահների կողմից որպես «ԽՍՀՄ արտաքին սահման»։

Այս պայմանագրերի չեղարկումը ավտոմատ կերպով կհանգեցնի 1921 թվականի Կարսի պայմանագրից առաջ գոյություն ունեցած իրավիճակին, այսինքն՝ Արցախը, Նախիջևանը, Կարսը և Արդահանը պետք կլինի վերադարձնել Հայաստանին։

Պայմանագրերի պահպանումը կնշանակի, որ այս հայկական տարածքները ևս անհայտ ժամանակ կհամարվեն ժամանակավորապես փոխանցված Թուրքիային և Ադրբեջանին։

Միակ «ելքը»՝ Հայաստանի կողմից այս պայմանագրերով խախտված իր իրավունքներից «կամավոր» հրաժարվելն է և Թուրքիայի և Ադրբեջանի խորհրդային սահմանների օրինականացումն է։

Թուրքիան սպասում է, որ Հայաստանի կողմից օրինականացվեն առաջին հերթին իր սահմանները, այլ ոչ թե Ադրբեջանի։

2009 թվականին Թուրքիան և Ռուսաստանը չկարողացան դրան հասնել «ֆուտբոլային դիվանագիտության» միջոցով, մասամբ ԱՄՆ-ի և ԵՄ-ի կոշտ դիրքորոշումների պատճառով։ Սակայն աշխարհաքաղաքական իրավիճակը հիմա այլ է։