Սիրելի արցախցիներ, ուշադիր եղեք բնակարանային ապահովման ծրագրի նոր փոփոխությանը, որի մասին շատերը չգիտեն

Այսպես՝ «Ծրագրի իմաստով ընտանիքը ծրագրին դիմելու օրվա դրությամբ գրանցված ամուսնության մեջ գտնվող ամուսիններից (միայնակ ծնողից), ՆՐԱՆՑ՝ 2023 ԹՎԱԿԱՆԻ ՍԵՊՏԵՄԲԵՐԻ 19-Ի ԴՐՈՒԹՅԱՄԲ 18 ՏԱՐԻՆ ՉԼՐԱՑԱԾ ԵՐԵԽԱՆԵՐԻՑ (այդ թվում՝ մինչև 2026 թվականի դեկտեմբերի 31-ը ներառյալ ծնված, եթե ընտանիքն առցանց դիմում-հայտարարությունը կներկայացնի և ծրագրով նախատեսված հավաստագիրը կստանա մինչև 2025 թվականի դեկտեմբերի 31-ը), ինչպես նաև ցանկացած այլ անդամից բաղկացած միավորն է, որը որպես ընտանիքի անդամ ներառված կլինի տվյալ դիմում-հայտարարության մեջ:»

Սա նշանակում է, որ կառավարությունը ավելի է վատթարացրել պայմանները, սահմանափակել ընտրությունը՝ կատարելով շատ անտրամաբանական փոփոխություն: Ստացվում է, որ ծրագրի իմաստով բոլոր նրանք, ովքեր մինչև 2023 թվականի սեպտեմբերի 19-ը անչափահաս էին, համարվում են երեխա, ծնողներին կցված և ազատ ընտրության հնարավորություն չունեն՝ այս պահին հանդիսանալով չափահաս անձ: Այսինքն՝ որպես չափահաս քաղաքացի, եթե անձը չի ցանկանում օգտվել ծրագրից, զրկում է նաև իր ծնողներին ու ընտանիքի մյուս անդամներին այդ հնարավորությունից: Հասկանալի է, թե ինչ նկատառումներով է կառավարությունը ստեղծել այս «ծուղակը», բայց սա արդեն խեղկատակություն է, բացահայտ ցինիզմ ու հակաիրավական նորմ: