Իրավապաշատպան Ժաննա Ալեքսանյանն արցախցի գործիչ Արթուր Օսիպյանին կոչ է անում դադարեցնել հացադուլը։

Հիշեցնենք, որ Արթուր Օսիպանը կալանավորվել է այն բանից հետո, երբ նախընտրական քարոզարշավի շրջանակներում մոտեցել էր Նիկոլ Փաշինյանին եւ Արցախի ու թալանի մասին սուր հարցադրումներ ուղղել նրան։ Ի պատասխան Փաշինյանը բղավել ու մեղադրանքներ էր հնչեցրել Արթուր Օսիպյանի հասցեին։ Արթուր Օսիպյանը կալանավայրում հացադուլ է հայտարարել եւ ասել, որ չի դադարեցնի այն, քանի դեռ Նիկոլ Փաշինյանն իրենից ներողություն չի խնդրել։

«Մենք պետք է հորդորենք, որ Արթուրը դուրս գա հացադուլից։ Ոչ միայն ես, այլ շատերն են համոզված նրա սկզբունքայնության ու վճռականության վրա, բայց չարժե հացադուլ անել, պահանջել այդ անարժեք ներողությունը։ Ո՞ւմ է պետք այդ ներողությունը, վերջին հաշվով հայտնի խոսք կա՝ ով ինչ խոսում է, իր մասին խոսում։ Եվ շատ լավ կլիներ, որ Արթուրը հացադուլից դուրս գար, նա պետք է իմանա, որ բազմաթիվ են մարդիկ, ովքեր իր կողքին են եւ իրեն գնահատում են, գիտեն իր նվիրավածությունն Արցախին ու Արցախի հարցին»,- Step1.am-ի հետ զրույցում ասաց Ժաննա Ալեքսանյանը։

Նրա խոսքով՝ Արթուր Օսիպյանին առաջադրված մեղադրանքն ապօրինի է։ Հիշեցնենք, որ նրան առաջադրվել է մեղադրանք միանգամից երեք հոդվածներով՝ խուլիգանություն, նախընտրական քարոզչությանը խոչընդոտելը եւ բռնություն գործադրելու հրապարակային կոչ անելը։

«Բոլորը տեսել են այդ տեսանյութը, թե ինչ կարեւոր հարցեր է բարձրացրել Արթուրը եւ պատասխան ստանալու փոխարեն հայհոյանքներ ու վիրավորանքներ է ստացել։ Դա Նիկոլ Փաշինյանի ձեւն է, երբ ինքը հարցերի չի պատասխանում, պատասխանում է այն մարդուն, ով հարցը տվել է, մենք դա շարունակաբար տեսնում է։ Արթուր Օսիպյանին անամոթաբար ակնհայտ ապօրինի մեղադրանք են ներկայացրել։ Դա վերաբերում է նաեւ Գլխավոր դատախազին, որը ցանկացած մեղադրանք կարող էր ներկայացնել։ Խուլիգանության մեղադրանք են ներկայացնում այն դեպքում, երբ հենց Արթուրին են քաշքշում, եւ Նիկոլ Փաշինյանն է օգտագործել փողոցային բառապաշար։ Երեւի մի օրը հերթը կհասնի նրան, որ Նիկոլ Փաշինյանը դատախազի հասցեին էլ այդպես կխոսի, չեմ բացառում, որ մենք դա էլ կտեսնենք»,- ասաց նա։

Իրավապաշտպանն անդրադառնում է նաեւ նախընտրական քարոզարշավի շրջանակներում իշխանության բառապաշարին, ընդդիմադիրների նկատմամբ կիրառվող բռնաճնշումներին ու դեպքին, երբ նախընտրական պաստառները պոկելու համար ձերբակալված եւ հոգեբուժարան տեղափոխված երիտասարդն ինքնասպան էր եղել։

Ժաննա Ալեքսանյանի խոսքով՝ իշխող ուժի կողմից ուղղակի տեսնում ենք անբարո քարոզարշավ։ Նա նշում է, որ ընդդիմության ներկայացուցիչների ձերբակալությունները չեն հիմնավորվում։ «Կուզենայի, որ այդ քաղաքական ուժերը վիճակագրություն ներկայացնեին, թե այդքան ձերբակալություններից քանիսն են հիմնավոր մեղադրանքով եղել։ Մենք տեսնում ենք, որ իրականում դրանք իրենց թքած-կպցրած ձայանգրություններն են, որոնք չեն հաստատվում։ Բայց ամենաշատը թշնամական վերաբերմունքն է ընդգծվում, մենք տեսնում ենք Նիկոլ Փաշինյանի թշնամական վերաբերմունքը, կոնկրետ Արթուր Օսիպյանի նկատմամբ ակնհայտ երեւում էր այդ թշնամանքը։ Այլ պաշտոնյաների մոտ էլ ենք դա նկատում, օրինակ՝ Թալինի քաղաքապետն արտոնյալ վիճակում է, ում ինչ բառերով ուզում, որակում է, եւ երեւի գնահատվում է իշխող ուժի կողմից։ Այսինքն՝ թքած ունեն մարդու վրա, բերդերը լցնում են անմեղ մարդկանցով, ընդհանրապես թքած ունեն արդարության վրա։ Ո՞ւմ է պետք է Նիկոլ Փաշինյանի այս քարոզարշավը։ Պետք է նայել, թե դա ինչ ազդեցություն է թողնում գիտակից խավի վրա, ինչպես է իրեն մերժում հանրային այդ շերտը»,- ասաց իրավապաշտպանը։

Նա ցավով արձանագրում է, որ քաղհասարակությունը, որը վերահսկող դեր ուներ, գոյություն չունի։ Իսկ նախկինում քաղհասարակության ազդեցությունն ակնառու էր։

Ժաննա Ալեքսանյանի խոսքով՝ մյուս քաղաքական ուժերը, որոնք մասնակցում են նախընտրական քարոզարշավին, որեւէ ձեւով չանդրադարձան Արթուր Օսիպյանի անօրինական կալանավորմանը։ «Այսինքն՝ ի՞նչ քարոզարշավ սա կարող է լինել, երբ նախընտրական պաստառ պոկելու համար ոստիկանության կողմից անձին ապօրինի բերման ենթարկելուց հետո հոգեբուաժանում մահ ենք արձանագրում, երբ Արթուր Օսիպյանի արտառոց դեպքին ենք ականատես լինում։ Ես սա կբնութագրեմ՝ քարոզարշավ դժոխքում»,- նշում է իրավապաշտպանը։

Ժաննա Ալեքսանյանի խոսքով՝ այս պայմաններում ժողովուրդը պետք է սթափ գնահատաի իրավիճակը․ «Շատ կուզեի, որ բոլորը գնան ընտրություններին, իրենց ձայնին տեր կանգնեն եւ մերժեն մի իրավիճակ, որին մենք նախկինում երբեք Հայաստանում ականատես չենք եղել»։

Արցախի Ազգային ժողովի նախկին նախագահ Դավիթ Իշխանյանը ընտանիքի միջոցով նորից ձայնային հաղորդագրություն է հրապարակել:

«Այն անհատները, պաշտոնական անձինք, որ մեր հետ շփվում էին, մեզ հուշում էին, անուղղակիորեն հասկացնում էին, որ դուք այստեղ եք այնքան, ինչքան ցանկանան Հայաստանի իշխանությունները: Մենք ուշադրություն չէինք դարձնում, զարմանում էինք՝ ինչպե՞ս կարող է այդպես լինել, ինչպե՞ս մեր հայրենի իշխանությունները չէին ուզենա, որ մենք վերադառնանք անիրականորեն, բայց այսօրվա տեսանկյունից արդեն ամեն ինչ պարզ է ու հասկանալի, որ, ցավոք, այդպես է, ցավոք, զարգացումներն ու այս դատավարության գործընթացը, այդ թվում՝ Հայաստանում տեղի ունեցող քաղաքական զարգացումներին համապատասխանեցնելու առումով մեզ ուրիշ կարծիք չի թողնում, որպեսզի ուրիշ կարծիք ունենանք, այլ այդ կարծիքը դառնում է համոզմունք», – նշել է Իշխանյանը:

«Մոտավորապես երեք տարի է՝ մենք այստեղ ենք, ոչ սկզբունքայնությունը, ոչ ողջախոհությունը, ոչ էլ կամքի ուժը մեզ չեն լքել ու դավաճանել», ասել է նա:

Նիկոլ Փաշինյանն օրեր առաջ ասաց, թե ամեն ինչ անում են հայ գերիներին ազատելու համար, ու միաժամանակ մեղադրեց ընդդիմադիրներին, թե նրանց ելույթները բացասաբար են ազդում այս հարցի լուծման վրա:

«Ադրբեջանում էլ են, չէ՞, հետևում քաղաքական խոսույթին, տեսնում են, չէ՞, Իշխանյանի կուսակիցները Հայաստանում ինչ խոսույթներով են հանդես գալիս, դա ազդո՞ւմ է ընդհանուր պրոցեսի վրա, իհարկե ազդում է», – ասել է Փաշինյանը:

Ադրբեջանական ռազմական դատարանում զմահ ազատազրկման դատապարտված Իշխանյանը շարունակվող ապօրինությունների մասին էլ է խոսում: Մինչև հիմա նույնիսկ մեղադրանքի ու դատավճռի ամբողջական տարբերակը հասանելի չէ իրենց: Բողոքարկել է դատարանի վճիռը, նիստը հուլիսի 2-ին է:

Արցախցի նախկին պաշտոնյան 20 օր առաջ էլ էր ահազանգել իր նկատմամբ ապօրինությունների մասին, դիմել էր Հայաստանի մարդու իրավունքների պաշտպանին, որ ադրբեջանական կողմից ստանա մեղադրանքի ու դատավճռի ամբողջական տեքստը և փոխանցի իր ընտանիքին: Պաշտպան Մանասյանն արձագանքել էր, թե իր լիազորությունների սահմանները Բաքու չեն հասնում:

Վերջին մեկ ամսվա ընթացքում Բաքվի բանտից ուղերձներ են հղել նաև նախկին արտգործնախարար Դավիթ Բաբայանն ու նախկին պետնախարար Ռուբեն Վարդանյանը: Նրանք ահազանգում են, որ այն, ինչ կատարվում է ադրբեջանական դատարանում էթնոքաղաքական վենդետա է հայ ժողովրդի դեմ:

Ռուբեն Վարդանյանը ուղղի քննադատել էր Նիկոլ Փաշինյանին, նրա Առաջին հանրապետության օրվա առթիվ ռազմական շքերթը որակել անբարոյականություն, երբ հայ զինվորականները Բաքվի բանտերում են ու զրկված տարրական մարդկային իրավունքներից: Նա Փաշինյանին Քաջ Նազար է անվանել։

Էջմիածնի Հ. Հովհաննիսյանի տուն-թանգարանում իրականացվում է «Հիշողության և աջակցության սրճարան» սոցիալական ծրագիր

Ծրագիրը կոչվում է «Ալցհայմերի խնամք Հայաստան» հասարակական կազմակերպության հիշողության և աջակցության սրճարան։ Վաղարշապատի համայնքապետարանի աջակցությամբ տուն-թանգարանում ժամանակավորապես հատկացվել է տարածք, որտեղ հավաքվում են տարեցներն ու կազմակերպում իրենց ժամանցը։

Էջմիածին քաղաքում է հաստատվել Հադրութի շրջանից տեղահանված Շուշիկ Հարությունյանը։ Նա Արցախյան 44-օրյա պատերազմում նահատակված, «Մարտական խաչ 2-րդ աստիճանի» շքանշանակիր, մայոր Աշոտ Հարությունյանի մայրն է, ով զոհվել է 2020 թվականի նոյեմբերի 7-ին, Շուշիի մատույցներում։ Զոհվածի մայրն անտրտունջ դիմանում է ցավին, որովհետև մենակ չէ․ իր նման հազարավոր մայրեր կան սևազգեստ։

Մեր զրույցի ընթացքում  նա պատմում է, որ Վաղարշապատի քաղաքապետարանում խոստացել են մի փոքրիկ անկյուն հատկացնել նրան՝ տեղավորվելով հավաստագրի գումարի մեջ։ Սպասում է, հավատում:

Տիկին Շուշիկը նշում է, որ Էջմիածնում իրեն լավ է զգում: Արցախցի տարեցներն այս քաղաքում ուշադրության կենտրոնում են։

Հ. Հովհաննիսյանի տուն-թանգարանի դահլիճում արցախցի, ինչպես նաև տեղացի տարեցների համար կազմակերպվում են միջոցառումներ, որոնց զոհվածի մայրը մասնակցում է մեծ սիրով։

-Պարբերաբար կազմակերպվող հանդիպումների ժամանակ մենք փորձում ենք հաղթահարել այն մեծ կարոտը, որ զգում ենք Հայրենիքից տեղահանվելուց հետո։ Կազմակերպվում են տարբեր միջոցառումներ, ֆիզիկական վարժություններ, ընթերցանության ժամեր, գրքի քննարկումներ, անց են կացվում հոգեբանական զրույցներ, որոնք անհրաժեշտ են յուրաքանչյուր տարեց մարդու համար։ Մեզ համար մի քանի անգամ կազմակերպվել են էքսկուրսիաներ։ Մոտ օրերս ևս կրկին էքսկուրսիա գնացինք Մեծամորի թանգարանը և եզդիական տաճարը։ Հանդիպումները կազմակերպվում են շաբաթական երկու անգամ, երկու խմբի համար՝ երեքշաբթի և հինգշաբթի։ Մեր խումբը կազմված է 16 հոգուց։ Արցախցիներիս հետ այդ հանդիպումներին մասնակցում են  նաև տեղացի տարեցներ, որոնց հետ մենք կարողացել ենք շուտ ընկերանալ։ Բոլոր հանդիպումներն անցնում են թեյի և սուրճի շուրջ, որն ավելի է մտերմացնում բոլորիս։ Մենք շատ գոհ ենք, որ նման հնարավորություն է ընձեռվել արցախցի տարեցներիս, ինչի համար շնորհակալություն ենք հայտնում նախաձեռնողներին։

Ամեն հանդիպումից հետո անհամբեր սպասում ենք հաջորդ հանդիպմանը։ Շատ շնորհակալ ենք ծրագրի համակարգող Գևորգ Չիչյանից, ով միշտ մեր կողքին է՝ իր բարեհամբյուր ու սրտացավ վերաբերմունքով,-ասում է տիկին Շուշիկը։

Տիկին Շուշիկի կարծիքը մեզ հետ կիսեցին նաև ծրագրին մասնակցող մի խումբ արցախցի տարեցներ։

Աջակցության սրճարանը զգալի դրական ազդեցություն ունի Արցախից տեղահանված տարեցների հոգեկան առողջության վրա։ Այն իրենց համար անվտանգ միջավայր է, որտեղ անկաշկանդ շփվում են, վերականգնվում և հաղթահարում հայրենիքից հարկադիր տեղահանումից հետո առաջացած կարոտի զգացումը։

2026 թվականի մարտ ամսին Վաղարշապատի համայնքապետարանի, Միասին» կրթամշակութային, սոցիալական, հոգևոր-դաստիարակչական համահայկական ՀԿ-ի, «Ալցհայմերի խնամք Հայաստան» կազմակերպության միջև կնքվել է համատեղ եռակողմ հուշագիր, ըստ որի նախատեսվում է Էջմիածնում ստեղծել տարեցների ժամանցի և զբաղվածության ապահովման ամենօրյա համայնքային կենտրոն։

Կարինե ԲԱԽՇԻՅԱՆ