Այլընտրանք արցախցիների համար, ովքեր չեն կարողանա օգտվել բնակապահովման ծրագրից
- 20:07 10.09.2025
Սեպտեմբերի 9-ի դրությամբ բնակապահովման ծրագրի շրջանակներում հավաստագիր ստացած արցախցիների թիվը կազմել է 2711, իսկ իրացված հավաստագրերի թիվը՝ 823։ Այս մասին Ազգային ժողովում ասաց աշխատանքի եւ սոցիալական հարցերի նախարար Արսեն Թորոսյանը։
Նա նշեց, որ 10 օրվա ընթացքում 60 հավաստագիր է իրացվել, գործընթացը գնում է առաջ։ Քանի որ ծրագրի պարտադիր բաղադրիչ է ՀՀ քաղաքացիություն ստանալը, Արսեն Թորոսյանն ասաց, որ ակտիվացել են նաեւ ՀՀ քաղաքացիություն ստանալու դիմումները։
«Մենք հիմա մշակում ենք եւս երկու ուղղությամբ ծրագրեր, հիմա չեմ ուզենա մանրամասներ ասել, քանի որ վերջնական չեն։ Մեկը վերաբերելու է այն քաղաքացիներին, որոնք հանգամանքների բերումով, ընտանեկան ու առողջական վիճակի պատճառով չեն կարող օգտվել այս ծրագրից։ Մենք հավանաբար այլընտրանք կառաջարկենք։ Եվ նաեւ զբաղվածության ակտվիության ծրագրեր ենք մշակելու այն քաղաքացիների համար, ովքեր կօգտվեն բնակարանային ապահովման ծրագրից, որովհետեւ լինում են դեպքեր, որ գումարը չի բավարարում կամ աշխատանք չունեն։ Նպատական է, որպեսզի զբաղվածության խթանումով իրենք այնուամենայնից դառնան շահառու, ունենան իրենց բնակարանը, մշտական բնակություն հաստատեն Հայաստանում, աշխատեն եւ դառնան մեր հանրության լիիրավ անդամ»,- նշեց Արսեն Թորոսյանը։